Иджыблагъэ Къэрал Думэм ещанэ еджэгъуэкIэ къыщащтащ «Пестицидхэмрэ агрохимикатхэмрэ шынагъуэншэу зегъэкIуэным и IуэхукIэ» Федеральнэ законым и 22-нэ статьям зэхъуэкIыныгъэ хэлъхьэным теухуауэ» федеральнэ закон №681101-7-м и проектымрэ «Мэкъумэш унэтIыныгъэ зиIэ щIыхэм къат хъерым къэрал кIэлъыплъыныгъэ иIэным и IуэхукIэ» Федеральнэ законымрэ.
2019 гъэм мэлыжьыхьым и 3-м законопроектыр къыхилъхьащ Къэрал Думэм мэкъумэш IуэхухэмкIэ и комитетым хэт Быф Анатолэ и лэжьэгъухэм я гъусэу. Ар хуэунэтIащ «Мэкъумэш унэтIыныгъэ зиIэ щIыхэм къат хъерым къэрал кIэлъыплъыныгъэ иIэным и IуэхукIэ» Федеральнэ законымрэ Урысей Федерацэм и ЩIы кодексымрэ хэлъ зэпэщIэуэныгъэхэр гъэзэкIуэжыным. Къапщтэмэ, ахэр ехьэлIащ щIым телэжьыхьхэм я хуитыныгъэхэмрэ къалэнхэмрэ зэIубзу зэрыщымытам.
Законопроектым хэлъ гупсысэхэм щытепсэлъыхьым щIэгъэкъуэныгъэшхуэ ягъуэтащ. Абы и фIыгъэкIэ етIуанэ еджэгъуэм ирихьэлIэу зэхъуэкIыныгъэ щхьэпэ зыбжанэ халъхьащ. Нэхъыщхьэу зыхуэкIуар - Урысей Федерацэм Мэкъумэш хозяйствэмкIэ и министерствэм и унафэм щIэт къэрал бюджет IуэхущIапIэхэм я пщэ иралъхьащ щIым и фIагъымрэ ар зэрагъэтэмэмыж щIыкIэмрэ къапщытэну. Ахэр бюджет ахъшэкIэ къэрал унафэ хэлъу ирагъэкIуэкIынущ. Абы и фIыгъэкIэ гъавэ щIапIэхэр нэхъ хъума, зэгъэзэхуа хъунущ, къыпах хъерми хэхъуэнущ.
Къыхэгъэщыпхъэщ законопроектыр къэрал мэкъумэш политикэм зэрезэгъыр, абы и унафэхэм зригъэужьу. Япэрауэ, мащIэу къагъэсэбэп щIыхэр мэкъумэш IэнатIэм къыхигъэхьэнурэ псы щIэгъэлъэдэным зригъэубгъунущ. ЕтIуанэрауэ, щIым и фIагъыр къэлъытэныр, къэпщытэныр, хъумэныр, къэIэтыныр къызэригъэпэщынущ. Абы ифI екIынущ Iэщ гъэхъунми, мэкъумылэмрэ Iусыпхъэхэмрэ зэхуэхьэсыныр нэхъ къаригъэхъулIэкIэрэ. Ещанэрауэ, зи гугъу тщIа Iуэхугъуэхэр, шэч хэмылъу, лъабжьэ быдэ хуэхъунущ къуажэхэм я социально-экономикэ зыужьыныгъэмрэ цIыхухэм я псэукIэр егъэфIэкIуэнымрэ. Къуажэ щIыналъэхэр зэIузэпэщ щIынымкIэ къэрал программэ зэхэтым апхуэдэ щIыкIэкIэ хабзэм и щIэгъэкъуэныгъэ лъэщ егъуэт.
