Республиканы ара шахарында жолланы тазалыкъда тутуугъа не заманда да бийик магъана берилгенди. Жер-жерли администрацияны оноуу бла былтыр анда уллу орамланы жуууп башлагъан тёре къайтарылгъанды. Алай техника жетишмегенини хатасындан бу ишни тынгылы этерге къолдан келмей тургъанды.
Быйыл а Сбербанкны болушлугъу бла мэрия орамланы тазалаучу он машина сатып алгъанды. Аланы санында тротуарланы эмда майданланы жайда, къышда да таза халда тутарча сибириучю эки машина да барды. Бу кюнледе аланы «Горзеленхозгъа» эмда шахарны паркына бергендиле, деп билдиргендиле администрацияны пресс-службасындан.
Къышда тротуарлада буз къаудан болмазча да мадар этилликди. Сагъынылгъан техниканы бир кесегини хайыры бла ол ишни бек тынгылы тамамларгъа къолдан келликди, деп ышандыргъандыла администрацияда.
Алайды да, жууукъ кезиуде бу машиналаны орамлада ишлей тургъанларын кёрюрге боллукъду. Айтханларына кёре, аланы хайыры иги болгъаны кёрюнсе, быллай техникадан энтта да сатып алыргъа оноу этилликди.