Бу кюнледе КъМР-ни Эл мюлк министерствосуну коллегиясы видеоконференция халда бардырылгъанды. Анга республиканы Правительствосуну Председатели Мусукланы Алий, аны биринчи орунбасары Сергей Говоров, эл мюлк министр Хасан Сижажев, КъМР-ни Башчысыны Администрациясыны таматасы Мухамед Кадзоков эм башхала къатышхандыла, деп билдиргендиле министерствону пресс-службасындан.
Хасан Сижажев билдиргенича, быйылны биринчи жарымында республикада 11,9 миллиард сом багъасына эл мюлк продукция чыгъарылгъанды. Озгъан жылны бу кезиую бла тенглешдиргенде, ёсюм кёп къалмай беш процент (4,7) болгъанды.
Союлмагъан ауурлукъда алып тергегенде, тууар эмда тауукъ этни производствосу 1,7 процентге кёбейип, 48 минг тоннадан атлагъанды. Сютден а 228 минг тонна сауулгъанды. Ол кеси да, былтырны биринчи жарымы бла тенглешдиргенде, 4,8 процентге асламыракъ болгъанды.
Тауукъ жумуртхаладан былтырдача аллай бир (94,5 миллион) жыйылгъанды. Бир ийнек башындан тергегенде уа, сют асламыракъ сауулуп тебирегенди. «Бу кёрюмдю онбеш процентге кёбейип, 3152 килограммгъа жетгенди», - деп чертгенди Хасан Лабидович.
Докладында министр аш-азыкъ эмда жарашдырыучу промышленностьлада болум бла да шагъырейлендиргенди. Ол айтханыча, сютден, андан жарашдырылгъан продукциядан, сора дагъыда татлы ашарыкъладан эмда сууладан, консерваладан да быйылны биринчи жарымында кёбюрек чыгъарыргъа къолдан келгенди. Аны бла РФ-ни Эл мюлк министерствосу бла КъМР-ни Правительствосу этген келишимде кёргюзтюлген, «АПК-ны продукциясыны экспорту» деген регион проектни чеклеринде белгиленнген умутла толусунлай толтурулгъандыла. Къысхасы, бу айны биринчисине продовольствие товарланы экспорту 19,5 миллион долларгъа жетгенди.
Шёндю сабанлада тирлик жыйыу къалай баргъанына Хасан Сижажев энчи эс бургъанды. «Бу иш заманындан кеч къалмай башланнганды. Аграрийле 220 минг гектардан тирлик жыяргъа керекдиле. Бу кюнлеге аны 62 минг гектарда тамам этгендиле; 207 минг тонна мирзеу жыйгъандыла», - дегенди Хасан Лабидович. Дагъыда ол айтханыча, мирзеулюк битимлени тирликлилиги бир гектарда 33 центнерге жетгенди. Ол а былтырны кёрюмдюсюнден жети процентге асламды.
Ахырында Мусукланы Алий: «Пандемия башланнганына да къарамай, Къабарты-Малкъарны эл мюлкю бир кюннге да тохтамай тири ишлейди. Къыралдан иги болушлукъ этилип тургъаны себепли анда бёлюмлени асламысында ёсюм эсленеди. Быйыл бериллик субсидияланы экиден бири алты айны ичинде иелерине жетгендиле. Аграрийле кёп иш этгендиле, алай мындан арысында да бютюн тири болуп, сау жылгъа белгиленнген борчланы жик-жиги бла тындырыргъа керекди», - дегенди.
Коллегияда къысха отчётлары бла Къабарты-Малкъар Республикада жерлени мелиорациясы эмда эл мюлкню суу бла жалчытыу Управленияны, ветеринария Управленияны, районлада жер-жерли администрацияланы эл мюлк бёлюмлерини келечилери да сёлешген эдиле.