Къабарты-Малкъарны Башчысы Казбек Коков республиканы ара шахарында къауум объектни эм жол ызланы къурулушларына бла тапландырыу ишлерини бардырылыуларына къарагъанды. Атажукин атлы орамдан Идарова орамгъа дери 5,6 километр узунлугъу Киров атлы орамны эм Ленин атлы проспектден Шогенцуков проспектге дери 1,43 километр узунлугъу Канукоев атлы орамны тынгылы ремонтлары тири барады. Кенгликлери 12-ден 14 метр болгъан магистрал орамлада суу кетиу, жарыкълыкъ бериу шёндюгю системала, тёрт кольцевой развязка, тротуар эм жаяу жюрюу жолчукъла къураллыкъдыла. Нальчикни эм кёп улоу жюрюген ызларындан бирини жангыртылыуу «Къоркъуусуз эм качестволу автомобиль жолла» миллет проектни чегинде тындырылады.
Проектге кёре къурулуш ахырына ноябрьни ортасына жетерикди, алай ишле графикни низамындан алгъа толтуруладыла. Белгиленнген миллет проектни чегинде Нальчик шахар округда бу жаны бла жумушла заман болжалдан алгъа тамамланнганлары себепли республикагъа къошакъ ырысхы бёлюнюрге боллукъду, аны хайырындан ара шахарыбызда энтта сегиз километрден артыкъ жолланы быйыл окъуна тап халгъа келтирир амал табыллыкъды. Сёз Мальбахов, Марко Вовчок, Иллазаров, Мовсисян атлы орамланы юслеринденди. Андан сора да, Головко, Профсоюзная, Мостовая эм бирси орамлада 2021 жылда жол ишле бардырыргъа проект документация жарашдырылады.
Ызы бла республиканы оноучусу Головко орамда эм Ленин проспектде скверледе болгъанды. Аланы тапландырыу проектлерин «Шёндюгюлю шахар болумну къурау» программаны жашаугъа кийириуню чеклеринде шахарчыла кеслери сайлагъандыла.
Головко орамда жангы скверни тапландырыу Уллу Хорламны 75-жыллыгъына жораланып, 2020 жылны июнюнда башланнганды, республикабызны айтхылы инсаны адмирал Арсений Григорьевич Головкону, ол ВОВ-ну жылларында Шимал флотха оноу этгенди, туугъан кюнюнде. Бюсту, аны КъМР-де жашагъан скульптор, РФ-ни Художниклерини союзуну келечиси С.И. Катони хазырлайды, скверни ара кесегинде салынырыкъды.
Казбек Коков, къурулушну башламчылары бла – ол тийреледеги юйледе жашагъанла бла – тюбешип, шахарны андан ары айнытыргъа себеплик этген тири жамауат ишлери, эсгертиулери эм предложениялары ючюн ыразылыгъын билдиргенди.
Аллай ишле Ленин проспектде орналгъан жангы 33-чю номерли школну тийресинде да бардырыладыла. Мында жашил жерчикле эм жаяу жолчукъла жарашдырыладыла, аланы узунлукъларына шинтикле, чыракъла эм гитче архитектура затла орналлыкъдыла. Битеу айтылгъан объектлени хайырланыугъа сентябрьни ахырына берилирге белгиленеди.
Иш бла барыуну чегинде КъМР-ни Башчысы «Жашау журт эм шахар болум» миллет проектни чегинде бардырылгъан Нальчик шахар округну суу ызларыны эм сооруженияларыны объектини къурулушуна къарагъанды. Проектге кёре водозабордан Кирова бла Тарчокова орамла къошулгъан жерге дери 6 километр чакълы бир суу баргъан труба салынырыкъды эм битеулю объёму 18000 м3 болгъан «Къургъакъ Шалушка» водозаборда эки ишлеп тургъан резервуаргъа ремонт этилликди. Аны хайырындан система кючлюрек боллукъду, жангы «Мей» микрорайонда кёп фатарлы юйлени суу бла качестволу жалчытыу да игиленирикди.
