|
Лъэужь дахэ къызэринэкIащ
21 июля, 2020 - 06:51
ЦIыху куэдым гущIыхьэ ящыхъуащ Аруан къуажэм и Бзылъхугъэхэм я зэгухьэныгъэм и гуащэ Къардэн Маринэ Мухьэмэд и пхъур игъуэ нэмысу дунейм зэрехыжар. ГъащIэр фIыуэ зылъагъу, сыт хуэдэ Iуэхуми хуэжыджэр, ицIыхухэм яхуэгумащIэ, имыцIыхухэми яхуэбзэIэфI Маринэ гъащIэ мащIэу къыщIэкIащ.
Аруан блэкI федеральнэ трассэм тет «Къардэн» шхапIэр и пщIантIэ щигъэлажьэрт Мари-нэ. Абы ипэ Аруан щIыналъэ сымаджэщым илъэс 30-кIэ медсестра нэхъыжьу щылэжьат. Арагъэнт куэдым къыщIацIыхури, мы махуэхэм иужьрей псалъэ гуапэхэр щIыкIэлъыжаIэри.
Зи хьэгъуэлIыгъуэ, махуэ лъапIэ, гущэхэпхэ, лъэтеувэ, гуфIэгъуэ Iуэху а рестораным щыдэзыхауэ Маринэ хуэмыарэзы абы къыщIэкIыжауэ къыщIэкIынкъым. ЕрыскъыкIэ жумартт а бзылъхугъэр, сомкIэ нэпсейтэкъым, хабзэкIэ ущигъэуэнутэкъым, IуэхукIэ къыпкъуэувэнут.
Блэжу едзэкъэну щIыхьахэми шхапIэм щызекIуэ хабзэмрэ ерыскъы IэфIымрэ ягъэщIагъуэрт. Псори зи фIыщIэр Маринэт, хьэлэлагърэ гукъабзагъкIэ абы къытекIуэн гъуэтыгъуейт.
Гуауэщ апхуэдэ цIыхум блэкIа зэманым иту утепсэлъыхьыныр. АпхуэдизкIэ жант, нэфIэгуфIэт, жыджэрти, лIэныгъэ зыми хуихьакъым, къеуэла узми къемылыну я пщIыхьэпIэ къыхэхуакъым. Ауэ цIыхуфIхэр нэхъ пасэу Алыхьым зыбгъэдешэж жыхуаIэр пэжу къыщIэкIынщ, Тхьэм апхуэдэу иухати, махуэ зыбжанэкIэ сымэджа нэужь, тхэкIыжащ.
Шэч хэлъкъым Маринэ и жэнэтыбжэр зэрызэIухам. Лэжьэным хуэщхьэхыртэкъым ар, жэщ, махуэ имыIэу Iуэхум пэрытт, сому къилэжьми жумарту псапэ хитыкIырт. Махуэшхуэхэм деж къуажэм дэс сабий ныкъуэдыкъуэхэм защIигъакъуэрт, саугъэтхэмкIэ яхуэупсэрт, и шха-пIэм къригъэблагъэрти, пшыхь нэгузыужьхэр яхузэхишэрт. Бзылъхугъэхэм я зэгухьэныгъэр зыхуей хуэзэу игъэлажьэрт, лъэпощхьэпо куэдым я хэкIы-пIэр къигъуэтыфырт.
Аруан къуажэм зы Iуэхуи щекIуэкIыртэкъым Маринэ хэмыту, мылъкукIи, IуэхукIи къикIуэтынутэкъым. КупщIафIэу, зэгурыIуэу ядэлажьэрт къуажэ, щIыналъэ администрацэхэм я унафэщIхэм. И лэжьыгъэфIым папщIэ мызэ-мытIэу къыхуагъэфэщат КъБР-м и Парламентым, Къэбэрдей Адыгэ Хасэм, нэгъуэщI къулыкъущIапIэхэм я щIыхь тхылъхэр.
Пхъу гущабэт Маринэ, анэ гумащIэт, къуэрылъху цIыкIуитхум я анэшхуэ бзэIэфIт, шыпхъу набдзэгубдзаплъэт, зыхуэдэ щымыIэ ныбжьэгъут. Псоми я деж нэсрэ дэрэжэгъуэкIэ яхуэупсэфу псэуащ ар. КъигъэщIар мащIэми, IуэхуфIрэ гуапагъэкIэ гъэнщIат, къэзыухъуреихьыр куэдми, и гулъытэрэ гумащIагъкIэ игъэфIащ. Жэнэтым зэрыкIуэныр псэу щIыкIэ къилэжьыжащ абы, псапэ хуэныкъуэхэми цIыху къызэрыгуэкI- хэми яхуищIар бэгъуауэ Тхьэм къыбгъэдилъхьэж. ЦIыхум и цIэр жаIэху, езыри псэущ жаIэ, Къардэн Маринэ ящыщщ лъэужь дахэ къызэзынэкIахэм. Жэнэтыр унапIэ хуэхъуауэ Тхьэм къыщIигъэкI!
НэщIэпыджэ Замирэ «Адыгэ псалъэ» газетым и къудамэм и унафэщI.
Къардэн Маринэ дунейм зэрехыжам щхьэкIэ, абы и благъэхэмрэ Iыхьлыхэмрэ яхуогузавэ Къэбэрдей Адыгэ Хасэр, «Адыгэ псалъэ» газетым и редакцэр.
|
29.03.2024 - 08:57 Урысей Ипщэмрэ Кавказ Ищхъэрэмрэ регби 7-мкIэ пашэныгъэр къыщыхьыным теухуа зэхьэзэхуэ иджыблагъэ Налшык къалэм щекIуэкIащ. |
|
29.03.2024 - 08:56 КъБР-м щIыхь зиIэ и журналист, Урысей Федерацэм, Къэбэрдей-Балъкъэрым щэнхабзэмкIэ щIыхь зиIэ я лэжьакIуэ, жылагъуэ лэжьакIуэ, «Советская молодёжь» газетым и редактор нэхъыщхьэу щыта Къардэн Мухьэм |
|
29.03.2024 - 08:56 Пхъэщхьэмыщхьэмрэ хадэхэкIымрэ къыхащIыкI консерву Кавказ Ищхъэрэм къыщыщIагъэкIым и процент 90-р Къэбэрдей-Балъкъэрым къылъос. |
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|