Бадзэуэгъуэм и 16-м лэжьыгъэ IуэхукIэ Къэбэрдей-Балъкъэрым щыIащ Уры­сей Федерацэм юстицэмкIэ и ми­нистрым и къуэдзэ Алханов Алий.
Алханов А. республикэм зэрыщы­Iэ­нум теухуауэ ягъэпса программэм ипкъ иткIэ ар япэщIыкIэ IущIащ КIуэкIуэ К. Абы кърихьэлIащ УФ-м Юсти­цэмкIэ и министерствэм и Iуэхухэр зэ­кIэ­лъы­зыгъакIуэ департаментым и унафэщI Строганов А. , УФ-м ЮстицэмкIэ и министерствэм и Управленэ нэхъыщхьэу Ставрополь крайм щыIэм и ­Iэтащхьэ ­Гультяев С., УФ-м ЮстицэмкIэ и министерствэм и Управленэу Къэ­бэрдей-Балъ­къэр Республикэм щы­Iэм и уна­фэщI ­Кужонов Ж.
Зэхуэсым щытепсэлъыхьащ къэрал ­политикэр пхыгъэкIыным, республикэм хабзэр къыщызэгъэпэщыным ехьэлIа лэжьыгъэр егъэфIэкIуэным, Къэбэрдей-Балъкъэрым щыпсэухэм юридическэ дэIэпыкъуныгъэ пщIэншэу ягъуэ­ты­ным ехьэлIа Iуэхур зэфIэгъэкIа зэры­-хъум. Абдежым къыщыхагъэщащ влас­тым и щIыналъэ, IэнатIэхэм къащтэ пра­вовой актхэр федеральнэ законода­тельствэм техуэу щытыным хуэунэтIа лэжьыгъэфI зэрырагъэкIуэкIыр.
КIуэкIуэ Казбек Алханов Алий фIыщIэ хуищIащ республикэм и нэIэ къызэрытетым папщIэ икIи адэкIи зэдэлэжьэну зэры­хьэ­зырыр жиIащ.
А махуэ дыдэм Алханов Алий зыщиплъыхьащ УФ-м ЮстицэмкIэ и министерствэм и Управленэу КъБР-м щыIэм къа­тихыу зэтету хуащIа унэщIэм икIи а IуэхущIапIэм и лэжьакIуэхэм яIущIащ.