Тюнене КъМР-ни Башчысыны къуллугъун болжаллы халда толтургъан К.В.Коков республиканы правительствосуну, министерстволарыны бла ведомстволарыны оноучулары, район администрацияланы таматалары бла кенгертилген кенгеш бардыргъанды. Анда предприятияланы бла организацияланы, инженер инфраструктураны кюз-къыш кезиуге хазырлыкъларыны, хайырланылгъан энергоресурсла ючюн борчланы юсюнден сёлешиннгенди.
Регионну башчысы Къабарты-Малкъарда ТЭК-ни эм жашау журт-коммунал мюлкню ышангылы ишлеулерин жалчытыргъа кереклисин чертгенди. «Бу бёлюмде жашау магъаналы борчланы битеу комплекси жууаплылыкъны эмда тохтаусуз эс бёлюп турууну излейди. Биз ишни болумун сюзерге, ол объектлени чурумсуз ишлерин жалчытырча къошакъ амалланы белгилерге керекбиз», - дегенди Коков.
Къыйын болумла чыкъгъанда хаталаны терк кетерген тийишли ресурс базаны къураргъа кереклисине да энчи эс бурулгъанды. КъМР-ни Правительствосуну Председателини орунбасары – инфраструктура эм цифралы айныу жаны бла министр В.Х Болотоков белгилегенича, республика жылыу жибериу кезиуге толу хазырды. Муниципал районланы бла шахар округланы жер-жерли администрациялары, Ростехнадзорну келечилери жашау журт фондну техника болумун тинтгендиле. Биринчи сентябрьге кёп фатарлы юйлени, жылыу берген предприятияланы хазырлыкъларын туура этген актлагъа бла паспортлагъа къол салыннганды, тозурагъан эмда авариялы халлы коммуникацияланы, суу эм ток ызланы алышдырыу бла байламлы ишле тамамланып бошалгъандыла.
Быйылны аллындан (2018 жылны январь-август айлары) башлап абонентлени битеу къауумларындан да энергоресурсла ючюн ахча жыйыу иги да ёсгенди, 77 процентге дери. Республикалы эмда жер-жерли бюджетледен финансла бла жалчытылыннган учрежденияланы тёлеулери толусунлай бериледиле.
Кенгешде КъМР-ни премьер-министри Мусукланы А.Т., Экология, технологический эм атом надзор федерал службаны Кавказ управлениясыны таматасыны орунбасары Б.Х. Бифов, Нальчик шахар округну администрациясыны башчысы Т.Б. Ахохов, Прохладна шахар округну администрациясыны башчысы И.В. Тараев да сёлешгендиле.
