«Урысей зэкъуэт» партым и исполкомым бадзэуэгъуэм и 14-м Москва щригъэкIуэкIащ партым и Совет нэхъыщхьэм и зэIущIэ. Абы и лэжьыгъэм хэтащ Къэбэрдей-Балъкъэрым и Iэтащхьэ КIуэкIуэ Казбек.
Зэхуэсым щытепсэлъыхьащ икIи щызэпкърахащ партым зэман гъунэгъум къыпэщыт къалэн нэхъыщхьэхэр икIи Къэрал Думэм хэкIыжахэм я пIэкIэ абы хагъэхьэнухэр хэхыжыным теухуауэ ирагъэкIуэкIыну IэIэтым «Урысей зэкъуэ-тым» къыбгъэдэкIыу хэтынухэм я кандидатхэр къагъэлъэгъуащ.
ЗэIущIэр иригъэкIуэкIащ партым и Совет нэхъыщ-хьэм и секретарь Турчак Андрей. Абы къыхигъэщащ пандемием и хабзэхэм щытет зэманым «Урысей зэкъуэтым» и дежкIэ нэхъыщхьэ дыдэу щытыр цIыхухэм я узыншагъэр хъумэным ехьэлIа къалэнхэр зэрыарар.
«Коронавирус узыфэ зэрыцIалэм ехьэлIа пандемием ди къэралым и цIыхухэм я гъащIэм зэхъуэкIыныгъэ-шхуэхэр хилъхьащ, дэтхэнэ зы цIыхури къытришащ зэса псэукIэм. ЦIыхубэ лъапIэныгъэхэу пщIэр, узыншагъэр хъумэныр, цIыхухэм къащхьэщыжыныр, хуэныкъуэм гулъытэ хуэщIыныр, зызэщIэдгъэкъуэныр япэ къищащ мы зэманым. Политикэ къару псом я деж- кIи ар гъэунэхуныгъэшхуэу щытащ. Иджыпсту зыми хуэмыдэ зэманщ, зэдэуэн-ри зэныкъуэкъунри лъэныкъуэ егъэзауэ, зэпэщIэтыныгъэхэм зэман темыгъэкIуэдауэ, дэтхэнэ къалэми, щIыналъэми, къуажэми щыпсэухэм махуэ къэс далъэIэсын, хуэныкъуэ дэтхэнэми дыдэIэпыкъун хуейщ, - жиIащ Турчак Андрей. - Нобэ сэ быдэу жысIэфынущ «Урысей зэкъуэтыр» а къалэным зэрыпэлъэ-щар. А лэжьыгъэм иджыри пещэ».
Къэбгъэлъагъуэмэ, къэралым и щIыпIэ псоми щрагъэкIуэкIащ цIыхухэм защIэгъэкъуэным хуэунэтIа Iуэхухэр. Абыхэм ящыщ куэдыр Урысейм и Президент Путин Владимир пщэрылъ ящищIахэрщ. Волонтёр гупхэр къызэщIагъэуIуэри, ерыскъыпхъэ-хэр, хущхъуэхэр, медицинэ Iэмэпсымэхэр цIыхухэм яIэрыгъэхьэным теухуа Iуэху щхьэпэ куэд зэфIагъэкIащ. Партым къыхилъхьа жэрдэм зыбжанэ Урысейм и Правительствэм къыди- Iыгъри, къэралым и экономикэр зэфIэгъэувэжыным хуэунэтIа лъэпкъпсо планхэм хагъэхьащ. Абыхэм ящыщщ IэнатIэншэхэм ират пособием хэгъэхъуэным, ар мазищкIэ фIэкIа ямыту щытамэ, а пIалъэм мазихым нэсу къыпащэ-ным, зи лэжьыгъэр къызэтезыгъэувыIэн хуей хъуа хьэрычэтыщIэхэми лэжьапIэншэхэм нэхъыбэ дыдэу ират пособием хуэдиз хуагъэувыным, апхуэдэуи лэжьыгъэм ехьэлIа законодательствэр егъэфIэкIуэным хуэгъэпсахэр.
Турчак Андрей жиIащ «Урысей зэкъуэтым» къыхилъхьа жэрдэм нэхъыщхьэхэм цIыхухэр трагъэпсэлъыхьыныр къызэригъэпэщын зэрыхуейр. Апхуэдэу Iуэхур ирагъэкIуэкIмэ, цIыхухэм партым и программэхэм къыхалъхьэфынущ бэм я сэбэп зыхэлъхэр, щытыкIэм хэкIыпIэ хуэхъунухэм ящыщу нэхъ тэмэму къалъытэхэр. А лэжьыгъэм и лъэныкъуэкIэ жэуаплыныгъэ нэхъыщхьэр зытещIэр партым и щIыналъэ къудамэхэрщ.
«Урысей зэкъуэтым» и Совет нэхъыщхьэм и секретарым къыхигъэщащ цIыхухэм я узыншагъэр, шынагъуэншагъэр хъумэн, гулъытэ яхуэщIын и лъэныкъуэкIэ властым и къудамэ псоми унафэ пыухыкIахэр къащтэну, лэжьыгъэ и пIалъэ зыщIэхэр адрейхэм ядэгуэшэным хуэгъэпса Iуэхухэр зэтраухуэну я пщэ къызэрыдэхуэр. Абы къыхэкIыу, «Урысей зэкъуэтыр» дохутырхэм щIэгъэкъуэн яхуэхъуну хьэзырщ абыхэм я жэрдэмхэр гъащIэм хэп-ща хъун папщIэ законхэр къыдэгъэкIынымкIэ, ахэр къэрал унафэхэм хэпщэнымкIэ.
«Депутат лэжьыгъэм зи зэфIэкI щеплъыжыну, зи мурадхэр зэзыгъэхъулIэну, властхэм я унафэхэм зи Iуэху еплъыкIэхэр къыщызыгъэлъэгъуэну хуей дохутыр псоми партым защIигъэкъуэн хуейуэ къызолъытэ», - жиIащ абы. Мыбдежым зи гугъу щищIыр партым и телъхьэ медици- нэ лэжьакIуэхэм я закъуэкъым, атIэ жэуаплыныгъэшхуэ зыпылъ и IэщIа-гъэр къыхэзыхахэу унафэ пыухыкIахэр къэщтэным, ахэр гъэзэщIэным гурэ псэкIэ хуэхьэзыр дэтхэнэри а Iуэхум къыхэшапхъэу къелъытэ.
КъимыдэкIэ, къэралым и Закон нэхъыщхьэм игъуэта зэхъуэкIыныгъэхэм ящыщ куэдыр «Урысей зэкъуэтым» игъэхьэзыращ икIи къыхилъхьащ, урысейпсо IэIэтым кърикIуари и щыхьэтщ Президентым къыхиха унэтIыныгъэр зэрыдаIыгъымрэ абы дзыхь зэрыхуащIымрэ. «Абы къыдэкIуэу а зэхъуэкIыныгъэхэр лэжьэныр хабзэкIэ щIэгъэбыдэным хуэунэтIа лэжьыгъэшхуэм и щIэдзапIэщ ар. «Урысей зэкъуэтырщ» абы кърикIуэнухэмкIэ жэуаплыныгъэ нэхъыщхьэр зи пщэм къыдэхуэри», - къыхигъэщащ партым и Совет нэхъыщхьэм и секретарым.
Турчак зэрыжиIамкIэ, хабзэхэм ехьэлIа зэхъуэкIыныгъэхэр ятеухуауэ щытынущ IэнатIэ куэдым. Абыхэм ящыщщ лэжьакIуэм и хуитыныгъэхэр хъумэным теухуауэ щыIэ шэсыпIэхэм иджыри къыхэгъэхъуэнри, пенсэхэмрэ пособиехэмрэ Iэмал имыIэу индексацэ щIынри, медицинэ дэIэпыкъуныгъэм и фIагъым хэгъэхъуэнымрэ ар хуэныкъуэ дэтхэнэми хуащIэнымри, экологие, егъэджэныгъэ IэнатIэхэри, къэрал унафэ щIыкIэр егъэфIэкIуэнри, ди щэнхабзэ хъугъуэфIыгъуэхэм яхуэсакъынри. «Ар ди парт проектхэм, партым и Исполком нэхъыщхьэм я къалэн нэхъыщхьэхэрщ икIи щIыналъэ къудамэхэм ящIыгъуу а лэжьыгъэм яужь итыпхъэщ», - къыхигъэбелджылыкIащ «Урысей зэкъуэтым» и Совет нэхъыщхьэм и секретарым.
