Битеуроссей Халкъ фронтну Къабарты-Малкъарда бёлюмюню келечилери, алгъаракълада Экологну кюнюн белгилей, Нальчикде хунерли сабийлени ачыкълау эмда алагъа себеплик этиу жаны бла «Антарес» араны тийресинде гюлле эмда айбат юлкюле орнатхандыла. Аланы зыгытларын а «Эколого-биология ара» бюджет учреждение бергенди. Бу ишни кезиуюнде активистле экологияны сакъларгъа кереклисини юсюнден видеороликле да тюшюргендиле, деп билдиргендиле ОНФ-дан.
«Бу, жаланда «Антаресде» окъугъан сабийлеге саугъа болуп къалмай, эм биринчиден, жаш тёлюню экологиягъа сакъ болургъа чакъырыуду. Табийгъатха аяулу кёзден къараргъа кереклисин, аны саулай жамауатха магъаналылыгъын ала гитчеликлеринден окъуна ангыларгъа анга къолдан келгенича къошумчулукъ эте турургъа тийишлидиле», - дегенди «Жаш тёлю ОНФ-ни» келечиси, инспектор-эколог Ярослав Галинский.
Акция шёндю, пандемияны кезиуюнде, бардырылгъанына да ол тийишли багъа бергенди. «Анга къатышханланы бары да кеслерин вирусдан къоруулагъан затланы хайырланыргъа унутмагъандыла. Ол а ахшы ишледен бизни бир зат да кери этмезлигин кёргюзтеди. Экология культурагъа юйретиу - къыралны тамблагъы кюнюнде монглугъун жалчытады, туугъан жерибизни табийгъат байлыкъларын келир тёлюлеге сакълайды», - деп къошханды.