Тюнене Нальчикде Правительствосуну юйюнде РФ-ни Президентини Шимал-Кавказ федерал округда толу эркинликли келечиси Александр Матовников Парламентни депутатларын, министрлени, жамауатны да КъМР-ни Башчысыны къуллугъун болжаллы халда толтургъан Казбек Коков бла шагъырей этгенди. Тюбешиуге РФ-ни Федерация Советинде, Къырал Думада республиканы келечилери, Конституциялы, Баш, Арбитраж сюдлени башчылары, Жамауат палатаны, право низамны сакълаучу органланы къуллукъчулары, жамауат эм дин организацияланы, партияланы бёлюмлерини келечилери, право сакълаучула эм башхала чакъырылгъандыла.
Аны ача, Александр Матовников РФ-ни Президенти Владимир Путин быйыл 26 сентябрьде Юрий Коковну Къабарты-Малкъарны Башчысыны къуллугъундан эркин этиуню юсюнден тилегин къабыл кёргенин билдиргенди. «РФ-ни Президентини быйыл 26 сентябрьде чыгъарылгъан Указына тийишлиликде, республиканы Башчысыны къуллугъун болжаллы халда Казбек Коков толтурлукъду. Ол кюн РФ-ни Президенти Владимир Путин Юрий Коковну Россейни Къоркъуусузлукъ советини секретарыны орунбасарына салыуну юсюнден Указны къабыл кёргенди», -дегенди ол.
Полпред Юрий Александрович КъМР-ге 2013 жылдан бери таматалыкъ этгенин, бу кезиуде республиканы экономикасында, социальный сферада иги жанына тюрлениуле болгъанларын чертгенди. «Жангы производствола ачылгъандыла, аграр секторгъа шёндюгю технологияла сингдирилгендиле, Шимал-Кавказ федерал округну 2025 жылгъа дери айнытыуну программасыны чеклеринде инвестиция проектле толтуруладыла.
Ахыры. Аллы 1-чи бетдеди.
Аны бла бирге социальный инфраструктураны объектлери ишленедиле, ол санда школла, больницала, сабий садла, маданият юйле. Регионнга туристле сюйюп келедиле, анга уа къонакъланы саны иги да ёсгени шагъатлыкъ этеди. Бу ишледе Юрий Александровични къыйыны уллуду», -дегенди эмда тамамлагъан иши ючюн ыспас этип, жангы къуллукъда жетишимле тежегенди. «Сизни сынауугъуз, оюмлулугъугъуз Кавказда керек болгъанлай турлугъуна ишеклик жокъду», -деп къошханды.
Андан ары Александр Матовников жыйылгъанланы Казбек Коков бла шагъырей этгенди. Ол аны республикада иги таныгъанларын, аны атасы КъМР-ни биринчи президети Валерий Мухамедовичге КъМР-де, къыралда саулай да хурмет уллу болгъанын белгилегенди.
Казбек Коков а республиканы Парламентини депутатына сайланнганды, толтуруучу власть органлада ишлегенди, министрини орунбасары да болгъанды. Арт кезиуде РФ-ни Президентини Администрациясында Ич политика жаны бла управленияда ишлеп, анда сынау жыйышдыргъанды.
- РФ-ни Президенти Казбек Валерьевични КъМР-ни Башчысыны къуллугъун толтурургъа ышаннганы уллу жууаплылыкъ салады. Бу ишде энчи эс май указланы толтуруугъа бурулады, бек алгъа «РФ-ни 2024 жылгъа дери айнытыуну миллет борчларыны эм стратегиялы жумушларыны юслеринден» Указгъа. Анда халкъны жашауун игилендириу, къолайлыгъын ёсдюрюу жаны бла магъаналы борчланы уа власть органла, граждан обществону институтлары, жамауат саулай бирикселе тамамлаяллыкъбыз, - деп чертгенди полпред.
Александр Матовников Парламентни депутатларына, къайсы партиядан болгъанларына, миллетлерине, динлерине да къарамай, республиканы жангы оноучусуна билеклик этерге, не жаны бла да болушургъа чакъыргъанды.
Ызы бла Юрий Коков сёлешгенди. Биринчиден, РФ-ни Президентине анга федерал даражада жууаплы къуллукъну ышаннганы ючюн ыразылыгъын айтханды. «Къабарты-Малкъар не жетишимле болдурулгъан эсе да, анда бу залда жыйылгъанланы къыйынлары уллуду. Республикада жашауну игилендирир, халкъны къолайлыгъын ёсдюрюр ючюн барыбыз да къадалып ишлегенбиз», -дегенди ол.
Юрий Александрович республиканы жамауатын Россейни Президенти сайлагъан адамны тёгерегинде биригирге, анга болушургъа чакъыргъанды. «Республикада федерал программала толтуруладыла, ала мындан ары да бардырылырла жашауда деп ышанама. Бюгюнлюкде федерал ара субъектлени айнытыугъа уллу эс бурады, берилген онгла бла хайырланыргъа керекди. РФ-ни Президентини, Правительствосуну, федерал структураланы болушлукълары болмасала, биз айныуну жолуна чыгъаллыкъ тюйюл эдик.
Мындан ары да тамамланыллыкъ жумушла энтта кёпдюле. Хурметли шуёхларым! Мен сизни атыгъыздан Къабарты-Малкъарны халкъына манга этген билеклик ючюн ыразылыгъымы айтыргъа сюеме»,-дегенинде уа залда олтургъанла ёрге къобуп къарс ургъандыла.
Казбек Коков да сёзюн Россейни Президентине анга этилген ышаныулукъ ючюн ыразылыкъдан башлагъанды. «Билимими, сынаууму, битеу къарыууму да аямай ишлерге, халкъыбызны жашауун игилендирир ючюн къолдан келгенни этерге хазырма. Мында халкъ сайлагъан депутатла, жамауат къуллукъчула, республикада атлары белгили адамла жыйылыпдыла. Быллай команда бла битеу борчланы толтураллыгъыбызгъа ишеклигим жокъду», - дегенди ол эмда Юрий Коковха федерал къуллукъда жетишимле тежегенди.
Тюбешиуде Россейни илмула академиясыны КъМР-де илму арасыны башчысы Пётр Иванов, Парламентни депутаты, Нальчикни 9-чу номерли школуну директору Ольга Коротких, Бийик-тау геофизика институтну директору Беккиланы Мухтар, Парламентни депутаты Владимир Кебеков да сёлешгендиле.
Ала Юрий Александрович республиканы Башысыны къуллугъунда кёп магъаналы жумушла башлагъанын, Казбек Валерьевич аланы андан ары тамамларыгъына ышаннганларын айтхандыла. Сёз ючюн, Ольга Коротких арт жыллада школла, сабий садла ишленнгенлерин, сабий чыгъармачылыкъны «Кюн шахар» академиясы ачылгъанын айтханды. «Битеу тамамланнган жумушланы хайырындан окъуучуларыбыз къыралда даражалы вузлагъа киредиле. Сиз да билим бериуге быллай уллу эс бурурсуз деп бек ышанабыз»,- дегенди ол.
Беккиланы Мухтар а табийгъат къыйынлыкъланы хатасындан республиканы, битеу округну субъектлери да уллу къоранчла сынагъанларын чертгенди. Ол Юрий Коковну болушлугъу бла табийгъат къыйынлыкълагъа къажау программа федерал арада белгили этилгенин айтып, ол жашауда тамамланыллыгъына ышаннганын чертгенди.
Тюбешиуден сора уа Александр Анатольевич, Юрий Александрович эм Казбек Валерьевич журналистле бла тюбешгендиле. Аланы сорууларына жууапла бере, полпред Юрий Коковну республиканы оноучусуну къуллугъунда ишине уллу багъа бергенди, бютюнда жамауат къоркъуусузлукъну жалчытыуда, терроризмге бла экстремизмге къажау ишде. «Бюгюнлюкде уа бу къужур ишле унутулгъандыла, энди баш борчубуз экономиканы, социальный сфераны айнытыуду»,-дегенди ол.
