|
КIуэкIуэ Казбек и къулыкъум пэрохьэ
29 сентября, 2018 - 09:19
Къэбэрдей-Балъкъэр Республикэм и Iэтащхьэм и къалэн- хэр пIалъэкIэ зыгъэзащIэ КIуэкIуэ Казбек дыгъуасэ КъБР-м и Правительствэм япэу утыку къыщихьащ.
ЗэIущIэм хэтащ Урысей Федерацэм и Федеральнэ Зэхуэ-сым, КъБР-м и Парламентым я депутатхэр, КъБР-м и Правительствэм хэтхэр, республикэм и Конституционнэ, Нэхъыщхьэ, Арбитражнэ судхэм я унафэщIхэр, хабзэхъумэ IэнатIэхэм, районхэм, дин IуэхущIапIэхэм, Жылагъуэ палатэм, еджапIэ нэхъыщхьэхэм, профсоюз зэгухьэныгъэхэм я лIыкIуэхэр.
ЗэIущIэр къыщызэIуихым, Урысей Федерацэм и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэ, Урысейм и ЛIыхъужь Матовников Александр къеджащ Путин Владимир къыдигъэкIа Указхэм: УФ-м ЗыхъумэжыныгъэмкIэ и советым и секретарым и къуэдзэу КIуэкIуэ Юрий зэрагъэувым къыхэкIыу абы КъБР-м и Iэтащхьэм и къалэнхэр зэрыщхьэщихым, Къэбэрдей-Балъкъэрым и Iэтащхьэм и къалэнхэр пIалъэкIэ игъэзэщIэну КIуэкIуэ Казбек Валерий и къуэм пщэрылъ зэрыщищIымрэ ятеухуахэм.
- КIуэкIуэ Юрий 2013 гъэм и дыгъэгъазэм къыщыщIэдзауэ Къэбэрдей-Балъкъэр Республикэм и Iэтащхьэу лэжьащ. А зэманым къриубыдэу щIыналъэм щызэфIагъэкIар мащIэкъым: IуэхущIапIэщIэхэр къэунэхуащ, мэкъумэш IэнатIэр кIуэ пэтми йофIакIуэ, социальнэ Iуэхухэм гулъытэ ин ягъуэтащ, инвестицэ Iуэхухэм заужь, сымаджэщ, сабий гъэсапIэ, курыт еджапIэ, щэнхабзэмкIэ унэщIэ пщIы бжыгъэхэр къызэIуахащ, - жиIащ Матовников Александр. - Апхуэдэуи и мыхьэнэкIэ нэхъ цIыкIуу къыщIэкIынкъым щIыналъэм зыгъэпсэхуакIуэ къакIуэхэм я бжыгъэм зэрыхэхъуа-ми. Шэч хэмылъу, а псор зи ехъулIэныгъэр псом япэу КIуэкIуэ Юрийрэ абы къуэту дэлэжьахэмрэщ. Сыхуейщ лэжьыгъэ купщIафIэ зэрыригъэкIуэкIам къыхэкIыу КIуэкIуэм фIыщIэ хуэсщIыну икIи сохъуэхъу зыпэрыхьэ IэнатIэщIэми ехъулIэныгъэ къыщигъэлъэгъуэну. КъБР-м и Iэтащхьэм и къалэнхэр игъэзэщIэну ягъэува КIуэкIуэ Казбек мы зэманым зи IуэхущIафэкIэ и пщIэр къэзылэжьыжа, жэуаплыныгъэ зыхэлъ цIыхущ. Псоми зэрыфщIэщи, Казбек и адэ Валерий и зэманым республикэм хуищIар зыхуэдэм уасэ иIэкъым. Дыщогугъ абы и щапхъэм Казбеки тетыну.
Матовников Александр жиIащ КIуэкIуэ Казбек республикэм и IуэхущIапIэ зыбжанэм я унафэ-щIу зэрылэжьар, Налшык къалэ округым щIыпIэ самоуправленэмкIэ и Советымрэ КъБР-м и Парламентымрэ я депутату зэрыхахыгъар, КъБР-м мэкъумэш IэнатIэмрэ ерыскъыпхъэхэмкIэ и министрым и къуэдзэ къалэным зэрыпэрытар. 2015 гъэм и мэлыжьыхьым къыщыщIэдзауэ КIуэкIуэр щылэжьащ УФ-м и Президентым и Администрацэм политикэ кIуэцI IуэхухэмкIэ и управленэм.
- Дэтхэнэми ди къалэн нэхъыщхьэр УФ-м и Президент Путин Владимир къыдигъэкIа накъыгъэ унафэхэр, 2024 гъэ пщIондэ тещIыхьахэр, дгъэзэщIэнырщ. Зыщыдгъэгъупщэ хъунукъым: щIыналъэ унафэщIхэм ди къару зэхэлъкIэщ ди цIыхухэм я псэу- кIэр зэредгъэфIэкIуэфынур, - дыщIигъуащ Матовниковым.
Абы КIуэкIуэ Казбек зыхуигъазэри жриIащ сыт и лъэныкъуэкIи дэIэпыкъуну къызэригъэгугъэр.
КIуэкIуэ Юрий псалъэ щратым, псом япэу жиIащ УФ-м и Президент Путин Владимир IэнатIэ лъагэ къызэрыхуигъэлъэгъуам папщIэ фIыщIэ зэрыхуищIыр. Апхуэдэуи къыхигъэщащ КъБР-м и Iэтащхьэу зэрыщыта пIалъэм къриубыдэу щIыналъэм зэрызиужьам абы къыдэлэжьа псоми я фIыщIэ зэрыхэлъыр.
- Республикэм исхэм я псэукIэр зэредгъэфIэкIуэным дыхущIэкъуащ зэрытхузэфIэкIкIэ. ФIыщIэ хуэсщIыну сыхуейт УФ-м и Президентым и полномочнэ лIыкIуэу КИФЩI-м щыIэ Матовников Александри. Зэман кIэщIым къриубыдэу абы Кавказ Ищхъэрэм щригъэкIуэкIа лэжьыгъэм мыхьэнэшхуэ иIэщ, - жиIащ КIуэкIуэ Юрий. - Шэч къытесхьэркъым КъБР-м и Iэтащхьэм и къалэнхэр игъэзэщIэну дзыхь зыхуащIа КIуэкIуэ Казбек а IуэхуфIхэм зэрыпищэфынум. Республикэм и цIыхухэм фIыщIэ яхузощI, жэрдэм дахэхэр яIэу, дызэкъуэту дызэрылэжьам папщIэ.
КIуэкIуэ Казбек къыщыпса-лъэм жиIащ УФ-м и Президент Путин Владимир къыхуищIа дзыхьым щхьэкIэ фIыщIэ зэрыхуищIыр. «Апхуэдэ дзыхьыр си деж-кIэ зэрыпщIэшхуэм хуэдэ дыдэу, жэуаплыныгъэ ини пылъу къызэрыслъытэм шэч хэлъкъым. Си къалэныр згъэзэщIэн папщIэ си къару, зэфIэкI себлэжынукъым, псом нэхърэ нэхъыщхьэр цIыхухэм я псэукIэр нэхъыфI тщIынырщ. А мурадым республикэм ифI зыхэлъхэм телажьэхэр си гъусэу дылъэIэсыну сыщогугъ. КIуэкIуэ Юрий республикэм щригъэкIуэкIа лэжьыгъэм папщIэ фIыщIэ хуэсщIыну сыхуейт, адэкIи ехъулIэныгъэ иIэу къэралым хуэлэжьэну си гуапэщ», - жиIащ КIуэкIуэ Казбек.
ЗэIущIэм къыщыпсэлъащ ЩIэныгъэхэмкIэ Урысей Академием и Къэбэрдей-Балъкъэр щIэныгъэ центрым и унафэщI Иуан Пётр, Налшык къалэм и курыт еджапIэ №9-м и унафэщI Коротких Ольгэ, Бгы лъагэ геофизикэ институ- тым и унафэщI Беккиев Мухътар, КъБР-м и Парламентым и депутат Кебеков Владимир сымэ.
ЗэIущIэ нэужьым федеральнэ, щIыналъэ хъыбарегъащIэ IэнатIэхэм я лIыкIуэхэм упщIэ зыбжанэкIэ зыхуагъэзащ Матовников Александр, КIуэкIуэ Юрий, КIуэкIуэ Казбек сымэ. Матовни-ков Александр Къэбэрдей-Балъкъэрым иужьрей илъэситхум иIа ехъулIэныгъэ нэхъ инхэм къыщытеувыIэм къыхигъэщащ псом япэу терроризм щIэпхъаджагъэхэр емыгъэлэжьыным республи-кэ унафэщIхэр зэрыпэлъэщар. «2015 гъэм къыщыщIэдзауэ Кавказ Ищхъэрэм адрей и щIыналъэхэми хуэдэу республикэм мамырыгъэр щытепщэу зыужьыныгъэщIэм теувауэ жыпIэ хъунущ. Апхуэдэуи ехъулIэныгъэшхуэу къызолъытэ Урысей псом Къэбэрдей-Балъкъэрым мэкъумэш IэнатIэм зэрыщехъулIэмкIэ етIуанэ увыпIэр зэрыщиIыгъыр. Си фIэщ мэхъу КъБР-м и Iэтащхьэм и къалэнхэр зыгъэзэщIэну пэрыхьэ КIуэкIуэ Казбеки республи-кэм щызэтраубла IуэхуфIхэм зэрызригъэужьыфынур», - къыхигъэщащ абы.
- КIуэкIуэ Казбек лъэныкъуэкIэ къикIа цIыхукъым, Къэбэрдей-Балъкъэрым и Iуэхухэм фIыуэ хэзыщIыкIщ. Иужьрей илъэси 6-м ар УФ-м и Президентым и Администрацэм и управленэм Кавказ Ищхъэрэм и Iуэхухэр щызэригъакIуэу щыIащи, республикэр зыхуей-зыхуэфIхэм, зыхуэныкъуэхэм фIыуэ щыгъуазэщ. Абы къыхэкIыу республикэр иригъэфIэкIуэфыну дызыщыгугъщ, - пищащ КIуэкIуэ Юрий.
- Шэч хэмылъу, Къэбэрдей-Балъкъэрым и мэкъумэш IэнатIэм, социальнэ Iуэхухэм, промышленностым лъабжьэфI ягъуэтащ, ахэр едгъэфIэкIуэн папщIэ дэри ди къару деблэжынкъым, - дыщIигъуащ КIуэкIуэ Казбек.
|
29.03.2024 - 08:57 Урысей Ипщэмрэ Кавказ Ищхъэрэмрэ регби 7-мкIэ пашэныгъэр къыщыхьыным теухуа зэхьэзэхуэ иджыблагъэ Налшык къалэм щекIуэкIащ. |
|
29.03.2024 - 08:56 КъБР-м щIыхь зиIэ и журналист, Урысей Федерацэм, Къэбэрдей-Балъкъэрым щэнхабзэмкIэ щIыхь зиIэ я лэжьакIуэ, жылагъуэ лэжьакIуэ, «Советская молодёжь» газетым и редактор нэхъыщхьэу щыта Къардэн Мухьэм |
|
29.03.2024 - 08:56 Пхъэщхьэмыщхьэмрэ хадэхэкIымрэ къыхащIыкI консерву Кавказ Ищхъэрэм къыщыщIагъэкIым и процент 90-р Къэбэрдей-Балъкъэрым къылъос. |
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|