Черек районда бир талай кёп фатарлы юйлени тийрелерин эмда арбазларын тапландырыу барады. Бу ишле «Единая Россия» политика партияны «Тап шахар болум къурау» деген программасыны чеклеринде къуралгъандыла, деп билдиргендиле муниципалитетни жер-жерли администрациясындан.
Шёндюге къурулушчула Къашхатауда Шогенцуков, Абай эмда Мечи улу атлы орамлада битеу да жети юйню тийресин тап халгъа келтириу бла кюреше турадыла. Подряд организацияны ишчилери эски конструкцияланы кетередиле, жангы асфальт жаядыла, тёгерек-башны жашиллендиредиле. Ызы бла сабийлеге ойнарча майданчыкъла, машиналаны салыр жерле къурарыкъдыла эмда жангы бордюрла орнатырыкъдыла. Бу жумушланы барына да къыралны, республиканы эмда районну бюджетлеринден битеу да 4,197 миллион сом бёлюннгенди.
Сагъынылгъан программаны чеклеринде дагъыда жамауат тийрелени тапландырыргъа умут барды. Ол санда Жемталада Маданият юйню арбазында 1,323 миллион сом багъасына мадар этилликди. Бызынгыда аллай объектни тёгерегин тийишли халгъа келтирирге 523 минг сом къоратыллыкъды. Андан сора да, Аушигерде межгитни арбазын эмда Черек районнга кирген жерде орнатылгъан стеланы жангыртыргъа дейдиле. Биринчисинде – 48, экинчисинде уа 815 минг сом къоратыллыкъды.