Жумушларын тынгылы толтургъан организацияланы атлары айтылгъанды

Жылны ичинде КъМР-ни культура, саулукъ сакълау, билим бериу, халкъны социал жумушларын тамамлау учреждениялары толтургъан ишни качествосуна кёре къыралда 19-чу жерден ючюнчю жерге чыкъгъанды. Аны юсюнден Парламентни пленар жыйылыуунда белгили этилгенди.
Организацияла 2019 жылны ичинде кеслерини борчларын къалай толтургъанларына багъаны жалынчакъсыз экспертле бергендиле. Отчётну КъМР-ни Башчысы «РФ-ни субъектлеринде законла чыгъарыучу (представительный) эм толтуруучу къырал власть органланы ишлерине къурауну битеулю принциплени юслеринден федерал законнга тийишлиликде хар жыл да хазырлайды.
Ведомстволу организацияла кеслерини борчларын къалай толтургъанларын сюзюу жамауат контрольну амалларындан бириди. Ол, биринчиден, биригиуле къалай ишлегенлерин, алада болгъан кемчиликлерин ачыкълар мурат бла бардырылады. Экинчиден а, ала тамамлагъан жумушланы юслеринден жамауатха белгили этиледи.
Отчёт бла депутатланы КъМР-ни урунуу, социал къоруулау министри Асанланы Алим шагъырей этгенди. Бу махкеме жалынчакъсыз багъа бериуге жууаплы болгъанын белгилерчады.
Алай бла экспертле 188 организация къалай ишлегенлерин сюзгендиле. Ол санда саулукъ сакълауда – 20, культурада – 50, билим бериуде – 106, халкъны социал жумушларын тамамлауда уа 12 учрежденияны. Алада организация толтургъан ишни юсюнден информацияны ачыкълыгъы, алада адамлагъа рахматлы болумла къуралгъанлары бла къалгъанлары, ол санда жумушларын тамамлагъанда къаллай бир заман къоратылгъаны да эсге алыннганды.
Андан сора да, саулукълары осал болгъанла биригиулени жумушлары бла чырмаусуз хайырланырча онгла болгъанлары тинтилгенди. Ишчиле алагъа келгенлеге къалай тюбегенлери, не кёзден къаралгъанлары, аланы излемлери къалай толтурулгъанына ыразы болгъанлары бла къалгъанлары да тергелгенди.
Асанланы Алим билдиргенича, саулукъ сакълауда эм иги учрежденияланы санына Ара поликлиника, Медицина консультация-диагностика ара, Аллергиягъа къажау ара чыкъгъандыла. Культурада Быллымда бла Урожайныйде эмда Бахсан шахарда маданият юйле, Камменномостскийде культура юй жумушларын башхаладан айырмалы болгъанлары белгили этилгенди.
Социал сфераны юсюнден айтханда, Урван районда бла Нальчикде социал жумушланы толтургъан комплекс арала, Юйюрлеге эм сабийлеге социал болушлукъ берген республикалы ара эм игиле болгъанлары ачыкъланнганды. Билим бериуде уа 25 организация 100 балл алгъандыла.
Аладан 12-си - Зольск районда, жетиси Терк районда орналыпдыла, Нальчикде, Бахсанда эмда Элбрус районда - экишер махкеме. Министрни айтханына кёре, быйыл 201 махкеме кеслерини борчларын къалай толтургъанларын тинтирге мурат барды.
Депутатланы докладчыгъа соруулары кёп болгъандыла. Спикер Татьяна Егорова жалынчакъсыз тинтиулени бардыргъан организацияла къалай сайланнганларын билирге сюйгенди. Алим Орусбиевич айтханыча, аланы профильли министерстволада жамауат советле айырадыла.
Сёз ачыкъланнган кемчиликлени кетериуню юсюнден да баргъанды. Асан улу билдиргенича, алагъа къоранчла уллудула. Учрежденияланы файдаларыны азлыгъыны, алагъа ахча керекли ёлчемде бёлюнмегени ючюн кемчиликлени асламын кетерирге онг жокъду. Болсада, бу шарт эсге алынмай, учрежденияланы таматаларын дисциплина жууапха тартхан кезиуле болгъандыла.
Татьяна Борисовна 2018 жылда тинтиуле жаланда къырал бюджет организациялада бардырылгъанына эс бургъанды. Алай быйыл а аланы тизмесине энчи иели  компанияла да къошулгъандыла. Файдалары, тамамлагъан жумушлары тенг болмагъан биригиулени тенглешдириу тюзмюдю, деп соргъанды ол. Асанланы Алимни айтханына кёре, ала барысы да потребительлени жумушларын толтурууну жорукъларын сакъларгъа борчлудула.

Тикаланы Фатима.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.