Тюненени экинчи жарымында белгили этилген тарихлеге кёре, республикада коронавирус жукъгъанланы саны 2673-ге жетгенди. Бир кюннге саусузлагъа 81 адам къошулгъанды. Бусагъатда вирусдан 983 инсан сау болгъандыла. 29 май бир кюннге сау болгъанланы санына кёре эм бийикге тарихлени кёргюзтгенин айтырчады - 159 адам. Медицина болушлукъ 1674 саусузгъа бериледи. Жарсыугъа, аурууну къыйынлыгъын кётюралмай, 16 адам ауушханды. Ол санда тюнене Чегем эм Прохладна районладан 71-жыллыкъ эр киши бла тиширыу.
Вирусха къажау оператив штабдан белгили этгенлерича, республикада 41,2 мингден аслам тест бардырылгъанды. Ауругъанла бла тюбешип, инфекция жукъгъанына ишекли 2001 адам юйлеринде туруп, медицина тинтиуледен ётедиле, ол санда РФ-ни Саулукъ сакълау министерствосуну буйругъуна тийишлиликде алагъа компьютер томография бардырылады.
Госпитальлада 766 адам турады, ол санда реанимация бёлюмде 48 инсан, аладан 29-су ИВЛ-аппаратлагъа къошулгъандыла. 562 саусузгъа, аладан 67-си сабийледиле, болушлукъ амбулатория халда бериледи. Коронавирусну шартлары болмай аурууну 346 адам кётюреди, аладан 247-си акъылбалыкъ болмагъанладыла.
Эпидемия башланнгандан бери биринчи кере болуп Россейде бир кюннге бу ауруудан ауушханланы саны эки жюзден атлагъанды -232. Россейде COVID битеу регионлада да барды, ол бюгюнлюкде 387 минг адамгъа жукъгъанды. Тюненеден бюгюннге ауругъанлагъа 8572 адам къошулгъанды. Вирусдан 159,2 минг инсан сау болгъанды.
Джонс Хопкинс атлы университет белгили этген тарихлеге кёре уа, битеу дунияда бу ауруу 5,8 миллион адамгъа жукъгъанды, аладан 360,3 мингден аслам ауушхандыла. Алгъынча, хал Американы бирлешген штатларында къыйынды - анда ауругъанланы саны 1,7 миллиондан атлагъанды. Вирус жукъгъанланы саны Бразилияда уллулай къалады - 438,2 минг, бу къырал экинчи жердеди. Россей ючюнчю болгъанды.
Алимлени оюмларына кёре, вирус жукъгъанланы жартысында аурууну шартлары билинмей къалады. Аны юсюнден Москваны къырал университетини Медицина илму-билим бериу арасыны башчысы РАН-ны академиги Армаис Камалов айтханды. Ол белгили этгенича, адамны санлары аурууну терк окъуна хорлай эсе да, иммунитетге къыйналыргъа тюшеди.
Къырада коронавирусну багъыуну жангы мадарлары кийириледиле. Болсада, алим акъыл этгенича, аны хорлар ючюн халкъны саулау тинтирге, тестле бардырыргъа керекди. Ол а аурууну шартлары билинмей кётюргенлени ачыкъларгъа, жугъаргъа къоркъуу уллу болгъан къауумланы сакъларгъа онг берликди.
Адамны иммунитети кючлю эсе, COVID-19 жукъса, аны санлары вирусну ангылап, андан кеси къорууланып башлайды. Алай бла бу адамлада аурууну шартлары жокъдула - ол жётел этмейди, температурасы кётюрюлмейди, солугъанда къыйналмайды.
Вирус жукъгъанын а асламында компьютер томография тинтиуле бардырылгъанда ачыкълайдыла. Ауруу билинмей эсе да, адамны ёпкелери «мутхуз миялагъа» ушайды. Ма ол а бютюнда къоркъуулуду. Ёпке бузулса, адамгъа солугъан къыйын болады. Аланы бакъгъандан сора кёп заманны реабилитация этерге тюшерикди, дейди алим.
- Аны ючюн, Юг Кореядача, хакъны саулай тинтирге, тестле бардырыргъа тийишлиди. Алай бла вирус жукъгъанланы, аны шартлары билинмей ауругъанланы, инфекциягъа иммунитетлери болгъанланы ачыкъларгъа къолдан келликди, -дегенди Армаис Камалов.
