Накъыгъэм и 21-м, Кавказ зауэр зэриухрэ илъэси 156-рэ щрикъум ирихьэлIэу, «Псэ Жыг» фэеплъым удз гъэгъахэр тралъхьащ КъБР-м и Iэтащхьэ КIуэ­кIуэ Казбек, КъБР-м и Парламентым и УнафэщI Егоровэ Татьянэ, Прави­тельствэм и УнафэщI Мусуков Алий, Дунейпсо Адыгэ Хасэм и тхьэмадэ Сэхъурокъуэ Хьэутий.
Апхуэдэу, а махуэм фэеплъым деж къыщызэхуэсахэм яхэтащ ­КъБР-м и Iэтащхьэм и Администрацэм и Уна­фэщI Къуэдзокъуэ Му­хьэ­мэд, УФ-м и Къэ­рал Думэм и депутат Геккиев ­Заур, Налшык къалэ администрацэм и Iэтащхьэ Ахъуэхъу Таймураз, Къэ­бэрдей Адыгэ Хасэм и тхьэмадэ Хьэ­фIыцIэ Мухьэмэд, абы и ­къуэдзэ Лъху­къуэщауэ Хьэбас, министерствэ зэ­мы­лIэужьыгъуэхэм я лIы­кIуэ­хэр, КъБР-м и щIыналъэхэм я Iэтащ­хьэ­хэр.
КъБР-м и Муслъымэнхэм я дин IуэхущIапIэм и тхьэмадэ Дзасэжь Хьэзрэталий кърихьэлIахэм дыуэ яригъэщIащ.
Кавказ зауэм хэкIуэда адыгэхэм я фэеплъ махуэм ди республикэм щыгъуэ-щIэж Iуэхухэр сыт щыгъуи куэду щокIуэкI. АрщхьэкIэ зэфIэува эпидемиологие щытыкIэ хьэлъэм и зэранкIэ мы гъэм апхуэдэхэр щыIакъым, ауэ интернетыр къагъэсэбэпри, цIыху минхэр хэтащ флеш-мобхэм, а гузэвэгъуэр зэращымыгъупщам и гугъу ящIу.