Совет Союзну заманларында Нальчик шахар Шимал Кавказда угъай, битеу деменгили къыралда окъуна аты атылгъан курортха саналгъанды. Шёндю ол бийик даражаны къайтарыргъа итинедиле.
Ол акъыл бла бу кюнледе Канукоев орамны кенгертиу эмда толусунлай жангыртыу ишле башланнгандыла. Шахарны жер-жерли администрациясындан билдиргенлерича, ол тёрт ызлы боллукъду. Кеси да жанында жаяу жюрюгенлеге жолчукълары, кече жарытырча чыракълары бла. Ызы бла «Нальчик» универмагны ал жанында хайырланылмагъан тийреде ариу сквер къураллыкъды.
Бу ишле бла бирге жолчула Шогенцуков атлы проспектде да къармашып тебирегендиле. Эсигизде эсе, былтыр аны жанында бордюр ташланы жангыларына алышындыргъан эдиле, энди уа эски асфальтны къырып кетередиле. Ызы бла жангысын саллыкъдыла, жанында эски чыракъланы орунуна уа шёндюгю тюрлюлерин орнатырыкъдыла.
Велосипедледе учаргъа сюйгенлени да унутмагъандыла. Бу проспектни эмда Канукоев орамны узунлугъуна алагъа деп энчи жолчукъла ишлерикдиле.
Быладан сора да, бир талай замандан Марко Вовчок атлы орамны, Канукоев орамдан башлап, «Бёрю къабакълагъа» дери кесегин да жангыртыргъа дейдиле. Шахарны администрациясында айтханларына кёре, аны проект-смета документациясы хазырды. Бу жолда, бирси экисиндеча, аллай ишле бардырыллыкъдыла, дагъыда маршрут автобусла тохтап, адамланы миндириучю жерлени, алгъын жылладача, проект бла энчи халлы этерикдиле.
