Солуу кюнледе КъМР-де коронавирус жукъгъанланы тизмесине 134 адам къошулгъанды эмда, оператив штаб белгили этген шартлагъа кёре, COVID-19 республиканы 1824 инсанында барды. Ауруудан 420 адам сау болгъандыла, ол санда бир кюнню ичинде 13 инсан.
Бюгюнлюкде 27,5 минг тест бардырылгъанды. Ауругъанла бла тюбешип, вирус жукъгъанына ишекли 2039 адам юйлеринде туруп, медицина тинтиуледен ётедиле. Госпитальлада 395 саусуз турады, жюз бла алтмыш бешге уа болушлукъ амбулатория халда бериледи. 637 инсан, ол санда 182 сабий, вирусну ышанлары болмай ауруйдула.
Россейде жукъгъанланы саны 290 мингнге жетгенди, 67 мингден аслам адам андан сау болгъанды. Джонс Хопкинс атлы университетни шартларына кёре, дунияда бу жангы вирус жагъылгъанла 4,7 миллиондан озгъандыла, аны ауурлугъун кётюралмай, 315,2 минг инсан ауушханды.
РФ-ни премьер-министри Михаил Мишустин баш кюн, 18 майда, бардыргъан видеокенгешде къыралда вирусну жайылыуу азайгъанын, аны бла байламлы уа 27 регионда карантин мадарла аз-аздан кетерилип башларгъа боллукъларын билдиргенди. «Ала коронавирус жукъгъанланы азайтхан субъектледиле»,-дегенди ол.
Болсада битеу регионлада да адамла медицина маскала киерге керекдиле, 65 жылдан абаданлагъа алыкъа жумушакълыкъ этилмейди. Ала юйлеринден тышына чыкъмазгъа борчлудула. Премьер-министр дагъыда «Госуслуги» порталны чырмаусуз ишлеуюн жалчытыргъа, 1 июньдан сабийлеге битеу тийишли тёлеулени берип башларгъа хазыр болургъа да буюргъанды.
Бу кюнледе белгили этилгенича, Россейде коронавирусну адамны солуууна кёре тохташдырып башларгъа боллукъдула. Аны юсюнден РФ-ни Илмула академиясында коронавирусха къажау ишчи къауумну секретары Ольга Дорохова айтханды. РАН-ны Сибирьде бёлюмюню Новосибирскде автоматика эм электрометрия жаны бла институтуну алимлери солууда болгъан органикалы затла адамны санында процесслени ачыкъларгъа, ол санда коронавирусну тохташдырыргъа, онг бергенлерин тохташдыргъандыла. Ол а халкъ жыйылгъан жерледе – аэропортлада, вокзаллада, тюкенледе - бютюнда хайырлы боллукъду.
Бир айдан а Россейде коронавирусха къажау вакцина хазырланыллыкъды. Аны юсюнден Эпидемиология эм микробиология тинтиуле жаны бла миллет араны башчысы Александр Гинцбург белгили этгенди. Аны айтханына кёре, айны ичинде энтта клиникалы сынаула бардырыллыкъдыла, андан сора уа Саулукъ сакълау министерство аланы адамгъа салып кёрюрге эркин этерикди.
Росприроднадзор бардыргъан тинтиуле уа сейир шартланы ачыкълагъандыла. «Таза хауа» федерал проектни чеклеринде бардырылгъан жумушла пандемияны эмда аны бла байламлы кийирилген чеклени хайырындан къыралны жети шахарында хауа артыкъда тазаланнганын кёргюзтгендиле: Братскда, Липецкде, Магнитогорскда, Медногорскда, Норильскде, Череповецде эмда Читада. Аны адамла транспорт бла хайырланмагъанлары, промышленный предприятияланы асламы ишлемегенлери бла байламлы этгендиле Росприроднадзорну келечилери.
Энтта тарихле. РФ-ни МВД-сы белгили этгенича, карантин бла байламлы чеклени кезиуюнде къыралда орамлада аманлыкъланы саны, аны аллында жылны бу кезиую бла тенглешдиргенде, 3,3 процентге азайгъанды. Ведомство белгили этген шартлагъа кёре, артыкълыкъ - 31,1 процентге, тонаула - 20,9 процентге, талауурла - 9,9 процентге, уручулукъ 11,2 процентге азайгъандыла.
Андан сора да, полициячыланы айтханларына кёре, мурдарлыкъ 4,9 процентге, билип, адамны саулугъуна заран салыуну 3,3 процентге тюшгендиле. Болсада бу кезиуде Интернетни, телефонну болушлугъу бла этилген хыйлачылыкъла эки кереге ёсгендиле.
