Къэбэрдей-Балъкъэрым и Премьер-министр Мусуков Алий видеоконференц мардэм иту иджыблагъэ иригъэкIуэкIащ КъБР-м и Правительствэм и зи чэзу зэIущIэр.
Iуэху 25-м зыщытепсэлъыхьа зэIущIэм гулъытэ нэхъыбэ щыхуащIащ коронавирус узыфэм зэрызиубгъуам къиша экономикэ, социальнэ гугъуехьхэр къызэнэкIа зэрыхъуну щIыкIэхэм.
Абы хуэунэтIауэ КъБР-м и Правительствэм и унафэм и проект къащтащ, зи акцэхэм я процент 25-р Къэбэрдей-Балъкъэрым и мылъкуу щыт IуэхущIапIэхэм, апхуэдэуи абыхэм я къудамэхэу хьэрычэт IэнатIэ мыинымрэ курытымрэ химыубыдэхэм, къэрал унитарнэ предприятэхэу республикэм и экономикэм щылажьэхэм республикэ бюджетым къыхэкIыу мы гъэм субсидиехэр зэрыхухахыну щIыкIэр щыубзыхуауэ. Мыбдежым зи гугъу щащIар щыIэ хъуа щытыкIэм и зэран нэхъыбэ зэкIахэрщ. КъБР-м финансхэмкIэ и министрым и къалэнхэр зыгъэзащIэ Лисун Еленэ зэрыжиIамкIэ, ядэIэпыкъуну я мурадщ лэжьакIуэ 700 IэнатIэ зыIут IуэхущIапIэ 24-м. А Iуэхум республикэ бюджетым щыщу сом мелуан 17 текIуэдэнущ.
ЗэIущIэм арэзы щытехъуащ КъБР-м и Правительствэм и унафэм и проектым, «2020 гъэм, 2021, 2022 гъэхэм я лъэхъэнэм Къэбэрдей-Балъкъэр Республикэм и республикэ бюджетым и IуэхукIэ» законым и 5-нэ, 12-нэ статьяхэм зэхъуэкIыныгъэхэр хэлъхьэным теухуам. А зэхъуэкIыныгъэхэр халъхьащ коронавирус узыфэщIэм земыгъэубгъуным хуэунэтIа лэжьыгъэхэр и чэзум зэфIэгъэкIыным, абы къишэ ныкъусаныгъэхэр гъэзэкIуэжыным, экономикэм и щытыкIэр нэхъыкIэ мыхъуным и чэзум мылъку хуаутIыпщын папщIэ.
ЗэIущIэм хэтхэм къащтащ КъБР-м и бюджетыр 2020 гъэм и япэ мазищым гъэзэщIа зэрыхъуам теухуауэ Лисун Еленэ ищIа отчётыр. ХэхъуэхэмкIэ ар сом меларди 7,7-рэ (илъэсым тещIыхьауэ процент 19-кIэ) гъэзэщIа хъуащ, илъэс кIуам и иджы хуэдэ лъэхъэнэм елъытауэ проценти 117,1-рэ. ХэщIхэр сом меларди 6,6-рэ (илъэсым яубзыхуам и процент 16) мэхъу, илъэс кIуам - проценти 115-рэ. Профицитыр сом мелардрэ мелуани 161,5-рэ мэхъу. Бюджетым къыхахам и процент 92,5-р трагъэкIуэдащ социальнэ мыхьэнэ зиIэ къалэн нэхъыщхьэхэр зэфIэгъэкIыным. Къэрал щIыхуэм пэкIуэр сом мелуан 11,9-рэ хъуащ. 2020 гъэм накъыгъэм и 1-м ирихьэлIэу къэрал щIыхуэр сом меларди 8-рэ мелуани 183,3-рэ мэхъу.
КъБР-м ХьэрычэтыщIэ IэнатIэ мыинымрэ курытымрэ я IэнатIэм хыхьэхэм щIыхуэ мыинхэр етынымкIэ и фондым субсидиехэр зэрыхухах щIыкIэр яубзыхуащ, щIыхуэ-лизинг Iуэхутхьэбзэхэр щызэфIагъэкIым трагъэкIуэдам щыщ хуапшыныжын папщIэ. КъБР-м экономикэ зыужьыныгъэмкIэ и министр Рахаев Борис жиIащ хьэрычэт IэнатIэ мыинымрэ курытымрэ хыхьэ IуэхущIапIэхэм ирата щIыхуэр сом мелуан 700 хуэдиз зэрыхъур. Апхуэдэуи къащтащ хэщIыныгъэ нэхъыбэ зыгъуэта IэнатIэхэу къэралым къилъытахэм хамыгъэхьахэу КъБР-м и хьэрычэт IэнатIэ мыинымрэ курытымрэ щыщхэми фондым субсидиехэр зэрахухихыну щIыкIэри.
Республикэм и Правительствэм 2020 гъэм мэлыжьыхьым и 29-м къыдигъэкIа унафэм ипкъ иткIэ КъБР-м и экономикэм и IэнатIэхэу щIэуэ къежьа коронавирус уз зэрыцIалэм (COVID-19) и зэран нэхъыбэу зэкIауэ къалъытахэм нэгъуэщIхэри хагъэхьащ. ЗэхъуэкIыныгъэхэр яхуэгъэзащ къэрал властым и гъэзэщIакIуэ органхэм я къэрал Iуэхутхьэбзэхэу «зы щхьэгъубжэ» мардэм тету МФЦ-м щызэфIагъэкIхэм. Абы дыщIагъуащ зи ныбжьыр илъэсищым къыщыщIэдзауэ илъэсибл ирикъуахэри хиубыдэу мазэ къэс хухах ахъшэр яхуэгъэувынымрэ ятынымрэ теухуа пункт.
ЗэхъуэкIыныгъэ игъуэтащ «КъБР-м узыншагъэр хъумэн IэнатIэм зыщегъэужьыныр» къэрал программэм мылъкур тегуэшэным ехьэлIа и Iыхьэми. 2020 гъэм Iэмэпсымэхэр къэщэхуным трагъэкIуэдэн, коронавирус узыфэм земыгъэубгъуным, абы ебэныным хуэунэтIа зыхуэфащэ лэжьыгъэхэр щызэфIэгъэкI лъэхъэнэм щытыкIэ гугъум иту лажьэхэм я улахуэхэм хущIагъун папщIэ федеральнэ бюджетым республикэ бюджетым трансферту къыхуиутIыпщым зэрыхигъэхъуам ипкъ иткIэ, а Iуэхухэм мылъкуу трагъэкIуэдэнури нэхъы-бэ ящIащ. КъимыдэкIэ, УФ-м и Правительствэм и резерв фондым щыщу КъБР-м и бюджетым мылъку къызэрыхуитIыпщым и фIыгъэкIэ ахъшэу къагъэсэбэпри нэхъыбэ хъуащ.
КъБР-м и лъэпкъ медицинэ къэхутакIуэ центрхэм къызэгъэпэщыныгъэ-методикэ лэжьыгъэхэр щрагъэкIуэкIыным хуэунэтIауэ УФ-м Узыншагъэр хъумэнымкIэ и министерствэмрэ КъБР-м и Правительствэмрэ зэдэлэжьэным теухуауэ 2019 гъэм жэпуэгъуэм и 28-м зэращIылIа зэгурыIуэныгъэм Iыхьэ щхьэхуэхэр щIагъуащ.
ЗэIущIэм дэфтэр зыбжанэ къыщащтащ мэкъумэш IэнатIэр дэIыгъыным, республикэм Iэщ зыгъэхъу и хозяйствэхэр гъэмахуэ хъупIэхэм щыщыIэну лъэхъэнэм хуэгъэхьэзырыным теухуауэ.