Оператив штабны жыйылыуунда республикада санитар-эпидемиология болум сюзюлгенди эмда вирус бла байламлы салыннган чеклени бир низамгъа келтириуню мадарларына къаралгъанды.
КъМР-ни Башчысы Казбек Коков видеоконференция амал бла коронавирус инфекцияны профилактикасы эм аны жайылыууна контроль жаны бла оператив штабны кенгешин бардыргъанды. Анда республикада санитар-эпидемиология болум сюзюлгенди, бу кезиуде саулукъ сакълау учрежденияла къалай ишлегенлерине эмда вирус бла байламлы кийирилген чеклени бир низамгъа келтирину мадарларына къаралгъанды.
КъМР-ни Башчысы быйыл 8 майда Роспотребнадзор юч излемни тохташдыргъанын эсгертгенди. Ала тамамланнганларына кёре вирус бла байламлы кийирилген чеклени аз-аз кетерип башларгъа боллукъду. Ала регионда эпидемиология болум, саулукъ сакълау системаны хазырлыгъы бла байламлыдыла.
- Сиз билгенден, май байрамладан сора энтта бир ыйыкъны, 15 майгъа дери, тёзерге, республикада эпидемиология болумгъа къараргъа оноу этген эдик. Энди уа оператив штабны чеклеринде оюмлу, не жаны бла да тинтилген оноула чыгъарыргъа, салыннган чекледен чыгъыуну жалчытыргъа, аны бла бирге уа инфекцияны къайтарылып жайылыууна къажау мадарланы тамамларгъа керекбиз,-дегенди республиканы оноучусу.
Казбек Коков КъМР-де Роспотребнадзорну таматасы Жирослан Паговну вирус бла байламлы болумну юсюнден оператив билдириуюне тынгылагъанды. Ол белгили этгенича, ведомство тинтиуле бардырып, COVID-19 къалай жайылгъаныны юсюнден шартланы РФ-ни Роспотребнадзору эм Саулукъ сакълау министерствосу бла келишдирилгендиле. Ол санда ненча тест бардырылгъаны, компьютер томография этилгени, ауругъанланы саны къалай ёсгени, саулукъ сакълау учреждениялада къошакъ жерле къаллай бир болгъанлары, саулукъ сакълау учрежденияланы тышында пневмонияла ненча болгъанлары, вирусдан ненча адам ауушханы кёргюзтюлгендиле.
КъМР-ни саулукъ сакълау министри Рустам Калибатов вирус жукъгъанланы багъыу къалай къуралгъаныны, аланы дарманла бла жалчытыуну, ненча жер болгъаныны, медицина керекле жетишгенлерини юслеринден билдиргенди. 11 майдан саусузланы 3-чю госпитальгъа элтип башлагъандыла, ол Прохладный шахарны бла Прохладна районну ара больницасында къуралгъанды. Бюгюнлюкде республикада саусузлагъа 521 жер барды, ала кислород эм ИВЛ-аппаратла бла жалчытылыныпдыла, аны бла бирге энтта 320 жер ачаргъа онг барды.
15 майда белгили этилген шартлагъа кёре, республикада 1619 адамгъа жукъгъанды коронавирус, андан 319 адам сау болгъандыла, вирусну къыйынлыгъын кётюралмай жетеулен ауушханды. Битеу да бирге бу кезиуде 25233 тест бардырылгъанды. 1998 адам юйде туруп, медицина тинтиуледен ётедиле. Госпитальлада кеслерине 357 адам бакъдырады, амбулатория болушлукъ 320 инсаннга бериледи. Вирусну шартлары билинмей 616 саусуз ауруйду.
