Тюнене Россейни Президенти Владимир Путин коронавирус бла болумгъа жораланнган кезиулю кенгешни видеоконференция халда бардыргъанды. Анга КъМР-ни Башчысы Казбек Коков да къатышханды.
Кенгеш эки кесекден къуралгъанды. Биринчисинде коронавирус жайылгъан болумлада инсанлагъа бла экономикагъа болушуу бла байламлы мартда бла апрельде этилген оноула къалай толтурулгъанларына къаралгъанды. Экинчиси уа чек салыудан чыгъыу амалла бла байламлыды. Владимир Путин битеу оноула инсанларыбыз, гитче эмда орталыкъ бизнес тюбеген чырмаулагъа, тыйгъычлагъа кёре этилгенлерин эсгертгенди.
«Битеу мадарланы арасында сабийлери болгъан юйюрлеге, медицина учреждениялада бла терк болушлукъ берген службалада ишлегенлеге тюзюнлей ахча тёлеуню, ишчи жерлерин, уруннганларын сакълагъан предприятиялагъа къырал субсидияла эмда иш хакъгъа льготалы кредитле бериуню, налог, кредит, аренда тёлеулени арт болжалгъа салыуну эм магъаналыгъа санайма»,-дегенди Президент.
Ол миллет экономиканы баш бёлюмлерине – автопромгъа, къурулушха, банклагъа эмда отлукъ-энергетика комплексге, ОПК-гъа, ракет-космос бёлюмге болушууну къошакъ мадарлары этилгенлерин да эсге салгъанды. Этилген оноула бла белгиленнген мадарла къалай толтурулгъанларын эшитирге сюйгенин да айтханды.
Чек салыу низамны аз-аздан жумушата барыуну юсюнден айта, къырал башчы РФ-ни Правительствосу, Роспотребнадзор бла Къырал Советни ишчи къаууму бу болумдан чыгъыуну амалларын жарашдыргъанларын билдиргенди. Алай ашыкъмазгъа, чеклени кетериуге уллу сакълыкъ эмда жууаплылыкъ бла къараргъа чакъыргъанды. «Субъектледе хал башха-башха болгъанын кёрюп турабыз. Айтханымча, бир-бир жерледе къаты профилактика мадарланы сакъларгъа, аны къой, алагъа къошаргъа окъуна керекди, бир-бирлеринде уа аз-аздан жумушата барыуну белгилерге да боллукъду»,-дегенди Путин.
Алай ол ишни алимлени бла специалистлени оюмларына таянып эмда андан не чыгъаргъа боллугъун тергеп алай бардырыргъа кереклисин да эсгертгенди Россейни Президенти. «Бу ишде ашыгъыргъа арталлыда жарамайды. Сансызлыкъ, оюмсузлукъ бизни артха атаргъа боллукъду. Гитче жангылычны окъуна багъасы – адамларыбызны къоркъуусузлукъларыды, жашауларыды, саулукъларыды. Аны себепли хар этилген оноу ючюн правительствону къауумундан, регионлада коллегаларыбыздан да жууаплылыкъ къаты сураллыкъды»,-деп къошханды Путин.
РФ-ни Президенти регионланы башчыларын коронавирус бла байламлы салыннган чеклени кетерирге ашыкъмазгъа чакъыргъанды. Аны бла бирге уа самоизоляциядан аз-аздан чыгъыуну планларын да хазырларгъа керек болгъанларын эсгертгенди.
