Къабарты-Малкъарны Башчысы Казбек Коков район администрацияланы эм шахар округланы таматалары бла видеоконференция халда «муниципал сагъат» бардыргъанды. Аны ишине КъМР-ни Правительствосуну Председатели Мусукланы Алий къошулгъанды. Коронавирус инфекция жайылгъан болумлада социал-экономика тохташыулукъ, къолайсыз юйюрлеге болушлукъ тапдырыу соруула сюзюлгендиле.
Отузунчу апрельге Къабарты-Малкъарда COVID-19 инфекция 456 адамгъа жукъгъаны белгиленнгенди. Жукъгъанланы асламысы Нальчик шахар округдандыла (153 адам) эм Чегем райондандыла (87 адам). Алай вирус инфекцияны жайылыуу КъМР-ни битеу шахар округларында бла муниципал районларында эсленеди. Аурууну алгъадан билирча тестлени ётгенлени саны кюннге 700-800 адамгъа дери жетдирилгенди. Инфекция билинсе, саусузну, заманны оздурмагъанлай, компьютер томографиягъа жибередиле.
Социал службала къолайсыз юйюрлени продукт жыйымдыкъла бла жалчытыу ишни бардыргъанлай турадыла. Андан сора да, КъМР-ни Правительствосуну буйругъу бла къолайсыз гражданлагъа къошакъ болушлукъ этерча республикалы бюджетден муниципал районлагъа бла шахар округлагъа 18 миллион сомдан артыкъ ёлчемде дотацияла бёлюннгендиле.
Кенгешде дагъыда миллет проектлени бардырыу жаны бла ишлеге къаралгъанды. КъМР-ни Башчысы муниципал контрактлагъа къол салыу эм планнга тюшген ишлени заманында толтуруу жумушланы тирилтирге тийишлисин белгилегенди. Регион бюджетден 49 миллиондан артыкъ сом бёлюннген суу бла жалчытыу эм суу кетиу ыз объектлени проект-смета документацитяларын жарашдырыугъа энчи эс бурургъа керекди.
Видеоконференцияны чегинде КъМР-де жылыу бла жалчытыу кезиуню быйыл тамамланнганына эм жангы кезиуге хазырланыугъа энчи къаралгъанды.
