Къабарты-Малкъар къырал университетни ректору Юрий Альтудов «Точка кипения» арада видеоконференция халда алимлени кенгешин ётдюргенди. Аны чеклеринде бюгюнлюкде жарсытхан тюрлю-тюрлю магъаналы соруулагъа къаралгъанды.
Ол регламентге кёре ётгенди, ол санда къол кётюрюу система да ишлегенди. Эм биринчиден университетде коронавирус инфекциядан профилактика къалай бардырылгъаны бла шагъырейленнгендиле. Аны юсюнден юйретиу эм социал соруула бла байламлы проректор Геккиланы Солтан хапарлагъанды. Ол бюгюнлюкде общежитиялада 2590 студент тышына чыкъмауну низамында тургъанларын эм биринчи керек затла бла да толусунлай жалчытылыннганларын билдиргенди. Хар эки сагъатдан адамла аслам жюрюген жерледе тазалау мадарла этилгенлерин, жетерча бир медицина къап, къолпакъ эм антисептик да сатып алыннганын чертгенди.
Саулай айтханда уа, окъуучуланы саулукъларына хата жетмезча, ауруу жайылмазча КъМКъУ-ну оператив штабы болумну къаты контрольда тутханы да эсгертилгенди.
Андан сора да, советде онлайн халда ишлерини регламентин, дистанция халда окъутууну, жангы жорукълагъа кёре вузгъа приём бардырыуну юсюнден айтхандыла. Энчи стипендиялагъа тийишли студентле бла аспирантланы тизмесин къыбыл этгендиле. Дагъыда РФ-ни Билим бериу эм илму министерствосу къырал аттестат советни комиссиясына айыргъан преподавательле кёргюзтюлюннгендиле эм башха шартлагъа да къаралгъанды.
