Тюнене Нальчикде Али Шогенцуков атлы Къабарты драма драма театрда Черкеслилени халкъла аралы ассоциациясыны XII конгресси бардырылгъанды. Анга Европаны къыралларыны, Сирияны, Иорданияны, Абхазияны делегациялары, РФ-де адыгла жашагъан регионланы келечилери къатышхандыла.
Жыйылгъанланы алгъышлап, КъМР-ни Башчысы Юрий Коков сёлешгенди. Ол быллай даражалы тюбешиуню Адыгланы кюнюню аллында бардырыу иги тёреге айланнганын, ол къыралны регионларындан, тышындан да миллетни келечилерин бирикдирирге себеплик этгенин чертгенди. «Бу эки иш да адыг халкъны миллетлигин сакъларгъа, культураны айнытыргъа, гуманитар, экономика байламлыкъланы кючлерге бурулупдула»,-дегенди ол.
Юрий Александрович Черкеслилени халкъла аралы ассоциациясы халкъны энчиликлерин, ана тилни сакълауда, жарыкъландырыу, информация проектлени тамамлауда магъаналы иш толтургъанын да айтханды. «Тыш къыраллада жашагъан бир журтлуларыбыз бла байламлыкълагъа энчи эс бургъанлай, болушханлай турлукъбуз. КъМР-ни оноучулары Россейни регионларына, тыш къыраллагъа жолоучулукъларыны кезиуюнде адыг жамауат бла тюбешиулени дайым да бардырадыла. Бу ишге уа РФ-ни Тыш къыралланы ишлери жаны бла министерствосу да бийик багъа береди»,-деп чертгенди ол.
Республиканы Башчысы адыгла къайда жашасала да, Россейни кючлеуню баш борчларына санагъанларын да айтханды. Ол а къыралны битеу халкъларыны да ышаннгылы айныуларыны мурдоруду. «РФ-ни Президенти Владимир Путин Россейде жашагъан хар миллетни да айнытыугъа, къолайлы жашауун жалчытыугъа баш магъана береди. Ол а бизни халкъла Россейге къошулгъанлы 460 жыл толгъанын белгилеген кезиуде бютюнда жарыкъ ачыкъланнганды. Ол алгъышлауунда бизни халкъны россейли къыраллыкъны къурагъанда магъанасына бийик багъа бергенди»,-дегенди ол.
Юрий Коков Россейни Патриархы Кирилл республикагъа жолоучулугъуну кезиуюнде Къабартыны бийи Темрюко Идаровну къызы Марияны жакъчысы Мария Магдалинаны атын жюрютген ара килисаны ачыу жумушлагъа къатышханын эсгерип, ол бизни республика Россейни халкъларыны коронасыны инжиси болгъанын айтханын чертгенди. Артда Патриарх Москвада бийле Черкасскийле асыралгъан монастырьде эсгериу къанганы салыу жумушлада да болгъанды. Бу ишле миллетни айнытыугъа себеплик этгенлерин белгилегенди.
Сёз шёндюгю дунияда ана тилни, адет-тёрелени сакълауну юсюнден да баргъанды. Юрий Коков республиканы келечилерини башламчылыкълары бла ана тилледе билим бериуню юсюнден федерал законлагъа тюрлениуле этилгенлерин, алагъа кёре, КъМР-де окъутууну къабарты, малкъар тилледе бардырыргъа эркинлик берилгенин да чертгенди. «Россейде ана тилибизни, культурабызны айнытыргъа битеу онгла берилгендиле. Бюгюнлюкде уа республикада ишчи къауум къуралады. Ол миллет тиллени окъутуу жаны бла терен программала хазырларыкъды. Барыгъызны да аны ишине къатышыргъа чакъырама»,-деп къошханды ол.
Сёзюню ахырында Юрий Коков КъМР-де жашагъан битеу миллетле да бир бирге хурмет этгенлерин, республиканы айнытыуну баш амалы мамырлыкъ болгъанын айтханды. «Битеу чырмаулагъа да къарамай, экономика ышаннгылы айнытылады, социальный сферада жангыртыу жумушла толтуруладыла, къыралда инвесторланы сейирлери республикагъа уллуду. Биз битеу дуниягъа да башха миллетле бла келишиулюкде жашай билгенибизни, сабийлерибизни келир жашауларын къолайлы эталлыгъыбызны кёргюзтгенбиз. РФ-ни башха регионлары, тыш къыралла бла, биринчиден а, бир журтлуларыбыз жашагъан жерле бла бирге ишлерге хазырбыз, не жаны бла да ачыкъбыз. МЧА-ны бюгюннгю жыйылыуу бу ишге кенг жолла ачар деп ышанама»,-дегенди Юрий Коков.
Конгрессни пленар жыйылыуунда РФ-ни Президентини Шимал-Кавказ федерал округда толу эркинликли келечиси Россейни Жигити Александр Матовниковну, Къарачай-Черкес эм Адыгея республикаланы башчылары Темрезланы Рашидни бла Мурат Кумпиловну алгъышлаулары да окъулгъандыла.
Ызы бла Черкеслилени халкъла аралы ассоциациясыны башчысы Хаути Сохроков ахыр юч жылны ичинде тамамланнган жумушланы, келир заманнга салыннган борчланы юслеринден доклад этгенди.
XII конгрессде къурау соруула да толтурулгъандыла. Ол санда келир юч жылгъа МЧА-ны башчысы айырылгъанды. Бу къуллукъгъа уа жаланда бир кандидатура кёргюзтюлгенди – организацияны шёндюгю башчысы Хаути Сохроков. Делегатла аны жанлы къол кётюргендиле.
