РФ-ни Президентини СКФО-да толу эркинликли келечиси Юрий Чайка Нальчикде гражданланы приёмун бардыргъанды. Аны чегинде саулукъ сакълауда, жашау журт-коммунал мюлкде, юйлени ремонтун бардырыу ишледе жарсыула айтылгъандыла.
Элбрус районну Быллым элинден Мурачаланы Магомед РФ-ни Президентинде полпредден Ара район больницада флюорография этерча стационар аппарат алыргъа себепликни тилегенди. Эндиге дери ишлеп тургъан прибор иги да эскиргенди, терк-терк бузулады, флюорография этерча башха оборудование райбольницада жокъду.
Кенжеден Борис Хуажев элни юч орамында канализация ыз ётдюрюлсе излегенин билдиргенди. Ол тийрени жерини тапсызлыгъы ючюн техника жаны бла оноу этерге эмда оюмну жашаугъа кийирирге къыйынды.
Руслан Шомахов Терк муниципал районну Тамбовское элинде суу бла жалчытылыныу жарсыулагъа къарарча тилегенди. Мында эскирген быргъыланы алышындырыу ишле бардырылыргъа керекдиле. Ол жумушла тындырылсала, элде 120 адамны таза суу бла жалчытыргъа онг чыгъарыкъды.
Рита Эльчепарова (Канкулова) Нальчикденди, тёрт сабийни анасыды, ол санда 18-жыллыкъ сакъат къызны. Тиширыугъа бёлюнюрге тийишли жер юлюшню теркирек берилирча себепликни тилегенди.
Педагогиканы ветераны, пенсиячы, биринчи группалы инвалид, ёлген эри Уллу Ата журт урушха къатышхан Таисия Герандокова да нальчикчиди, ол приёмда жашагъан журтуну юй башын бла ток проводкасын алышындырыу бла байламлы тилегин билдиргенди. Ала эски болгъандыла, алышындырыу бла байламлы ишлеге 300 минг сом изленеди.
Битеу тилеклеге кёре, болжалгъа салынмагъанлай, тийишли оноула этилгендиле, аланы толтурууну Юрий Чайка кесини энчи контролюна алгъанды.