КъМР-ни Правительствосуну кезиулю жыйылыуунда отузгъа жууукъ бегимни проектлерине къаралгъанды. Кенгешни Правительствону башчысы Мусукланы Алий бардыргъанды, аны ишине республиканы битеу министерстволарыны, ведомстволарыны эмда жер-жерли администрацияларыны келечилери къатышхандыла.
Сюзюуге чыгъарылгъан проектлени арасында иги кесеги алгъыннгы бегимлеге эмда программалагъа, сора дагъыда комиссиялагъа эм ишчи къауумлагъа тюрлениуле сингдириу бла байламлы эдиле.
Республиканы жер эмда ырысхы бла байламлы халланы министри Аслан Тохов Къабарты-Малкъарны иелигинде болгъан мюлкню приватизациялауну программасы былтыр къалай толтурулгъанын билдиргенди. Ол айтханнга кёре, сагъынылгъан кезиуде акцияладан сегиз пакет, чекленнген жууаплылыгъы болгъан обществолада тёрт юлюш, бир къырал учреждение, жеринден тепдирилмеген онбеш объект эмда эки машина сатаргъа умут этилгенди.
Аланы барысындан да бюджетге 810 миллион сом файда тюшерге керек эди. Сатыу бла байламлы жумушла тийишлисича тындырылгъандыла, алай бу ырысхыгъа алыучуланы жанындан хазна сурам болмагъаны ючюн хайыр алынмай къалгъанды. Аны себепли башха амалла бла «Каббалкплодопитомник» ООО-ну акцияларындан бир пакет, «Башил» эмда «Черек» солуу-саулукъландырыу легерьлени иелигинден биришер юлюш, «Китап ара» къырал предприятие, Тызыл талада орналгъан бир юй, тёрт жер участка эмда онеки автомашина сатылгъандыла. Аланы барындан да 31 миллион сом тюшгенди.
Министр билдиргеннге кёре, сатылмай къалгъан ырысхы быйылны приватизация планына кёчюрюлгенди. Аны юсюне республика дагъыда «Гидрометаллург» акционер обществону акцияларындан тёртден бирин сатарыкъды. План толусунлай толтурулса, бюджетге 209 миллион сом ётдюрюллюкдю.
Нальчикде Ленин атлы проспектни огъары жанында ишленнген жангы школну юсюнден да сагъыннгандыла жыйылыуда. Ол орналгъан жер (6,6 гектар) шёндю къыралны иелигиндеди. Энди уа аны республикагъа кёчюрюп, ызы бла муниципалитетге берирге дейдиле. Мусукланы Алий бу школну лицензиясын кеч къалмай алыр ючюн шахарны мэрине эмда министрге бу ишни март айгъа дери тындырыргъа буйрукъ бергенди.
Жыйылыуда кёп фатарлы юйлеге 2014-2043 жылланы чеклеринде тынгылы ремонт этиу жаны бла республикалы программа аны 2020-2022 жылланы ичинде бардырыллыкъ къысха болжаллы программасына келиширча этилгенин, экинчисини кезиуюнде неллай бир юйге, эмда къачан ремонт этиллигин билдирилгенди. Къурулуш эмда жашау журт-коммунал мюлк министрни къуллугъун толтургъан Вячеслав Кунижев айтханнга кёре, тёлеуню багъасы да тюрленирик тюйюлдю - ол бир квадрат метр ючюн, алгъынча, 6 сом 22 капек болгъанлай къалады.
Докладчы дагъыда ветеранлагъа эмда аланы юйдегилерине, сакъатлагъа, къыяулу сабийлери болгъан юйюрлеге деп 2020 жылгъа бирикген тизме къуралгъаныны юсюнден билдиргенди. Ары жашау журтлагъа тийишли болгъанладан 31 юйюр тюшгенди. Аланы жумушларын жалчытыргъа быйыл къыралны бюджетинден 18 миллион сом бёлюнюрюкдю.
Адамланы иш бла жалчытыу жаны бла республикалы къырал программагъа тийишлиликде инсанланы талай къауумуна къошакъ билим бериуню юсюнден урунуу эмда социал къоруулау министр Асанланы Алим айтханды. Ол кёргюзтген проектге кёре, жыл санлары пенсиягъа чыгъаргъа жууукълашхан 312 адамны жангы усталыкълагъа юйретирге быйыл 25 миллион сомдан аслам бёлюнюрюкдю. Тиширыуланы (167) иш бла жалчытыугъа уа 9 миллион сом жиберилликди.
Кенгешде «КъМР-ни жыйымдыкъ къауумларыны спорт жаны бла хазырлау арасы» ГКУ-ну къураргъа келишгендиле, республикада волонтёрлукъну 2024 жылгъа дери айнытыу программасын къабыл этгендиле, «Жаш профессионалла (World Skills Russia)» деген тёртюнчю регион чемпионатны къурау комитетини къауумун да дурус кёргендиле.
Саулай айтханда, сюзюуге чыгъарылгъан проектлени биринден къалгъанлары къабыл этилгендиле.
