КъБР-м щыIэ МВД-м Наркотикхэр зэрызэрагъэкIуэкIым кIэлъып­лъы­нымкIэ и управленэм (УНК), Урысей МВД-м и Управленэу Налшык къалэ щыIэм балигъ мыхъуа­хэм я IуэхухэмкIэ и IэнатIэм я лэжьа­кIуэ­хэр хэтащ «Ди сабийхэм я узыншагъэмрэ шынагъуэнша­гъэм­рэ пап­щIэ» акцэм хыхьэ «ЩIалэ­гъуалэр псэкупсэу гъэсэ­ным диным щиIэ мыхьэнэр» Iуэху щхьэпэм.
Налшык къалэм дэт курыт ­еджа- пIэ №10-м и класс нэхъыжьхэм щеджэхэмрэ егъэджакIуэхэмрэ ­яхуэ­защ КъБР-м щыIэ МВД-м и ­УНК-м и оперуполномоченнэ нэхъыжь, полицэм и подполковник ­Давыдовэ Иринэ, дин лэжьакIуэхэу КъБР-м и Муслъымэнхэм я дин ­IуэхущIапIэм и унафэщIым и къуэдзэ Сыжажэ Алим, IуэхущIапIэм и уна­фэщIым и дэIэпыкъуэгъу Амщыкъуэ Анжелэ, Мэзкуу Патриархатым и Псыхуабэ, Черкесск щIыналъэ Епархием и къудамэу КъБР-м щыIэм и лIыкIуэ Осипов Константин, КъБР-м КикбоксингымкIэ и федерацэм и ­президент Къудей Алим, Урысейм щIыхь зиIэ и тренер, ашихарэ-каратэмкIэ тIэунейрэ дунейпсо чемпион Сэбаншы Мурат, театрымрэ киномрэ я актёр Хьэмырзэ Ахьмэд, Урысей МВД-м и Управленэу Налшык къа­лэм щыIэм и Жылагъуэ советым ­хэт Бэ­гъуэт Хьэмидбий сымэ.
Сыжажэ Алимрэ Амщыкъуэ Анже­лэрэ ныбжьыщIэхэм яхутепсэ­лъы­хьащ экстремист Iуэху щIалэгъуалэм я деж щыIэныр къэбгъэхъу зэрымыхъунум, лъэпкъым хуэфащэу гъэсэн зэрыхуейм.
Осипов Константин къызэхуэсахэр къыхуриджащ пщIэ зэхуащIыным, щIалэгъуалэм диным зыхуагъэ­зэным, сабийхэмрэ ныбжьы­щIэхэмрэ тэмэму гъэсэным.
Полицэм и лэжьакIуэхэм къеда­Iуэхэм ягу къагъэкIыжащ хабзэм ­къемызэгъыу наркотикхэкIхэр зы­щэ­хэм административнэ, уголовнэ жэ­уап зэрахьыр, тепсэлъыхьащ нар­ко­тик­хэкIхэмрэ акъылыр зыгъэутхъуэ­хэмрэ кърикIуэ шынагъуэм, нарко­тикыр зытегуплIа цIыхум щIэ­пхъаджагъэ хьэлъэхэр икIи хьэлъэ дыдэхэр илэжьынкIэ зэрыхъунум, абы террорым ехьэлIахэри хыхьэу.
Сэбаншы Мурат, Къудей Алим, Хьэмырзэ Ахьмэд сымэ къытщIэхъуэ щIэблэм ягу къагъэкIыжащ гъащIэ гъуэгу тэмэм къыхэхыным мыхьэ­нэшхуэ зэриIэр. Чэнджэщ иратащ щIэныгъэм, спортым, гъуазджэм зыщагъэлъэгъуэну. Апхуэдэуи къызэ­хуэсахэм захуигъэзащ Бэгъуэт Хьэмидбий.
Iуэхум хэтхэм школакIуэхэр къыхураджащ гъащIэ узыншэм тетыну, жыджэрагъ яхэлъыну икIи жраIащ жылагъуэм щIэупщIэ щызиIэ цIыху къахэкIыну зэрагуапэр.