Къабарты-Малкъарны Башчысы Юрий Коков Правительствону юйюнде  Россейни Тау лыжа спорт эмда сноуборд жаны бла федерациясыны президенти Леонид Мельников бла тюбешгенди. Аны кезиуюнде Терс-Къолда къыралны регион, сабий эмда жыйымдыкъ командаларын хазырлауну баш базасын къурауну, шёндюгю спорт, саулукъну кючлендирирча, жараула бардырырча объектле ишлеуню онгларын сюзгендиле.
Леонид Мельников республиканы оноучуларына тау лыжа спортха иги кёзден къарагъанлары, анга тутхучлулукъ этгенлери, «Элбрусну къарлары» деген битеуроссей жай эришиулени къураугъа эмда бардырыугъа себеплик этгенлери ючюн жюрек ыразылыгъын билдиргенди.
-Биринчи кере мен Къабарты-Малкъарда 1975 жылда болгъанма да, ол мени жюрегимде бек сюйген жерлеримден бирича къалгъанды,-дегенди Тау лыжа спорт эмда сноуборд жаны бла федерацияны таматасы.
 Юрий Коков  а къонакъны атасын -  айтхылыкъ тау лыжачы, СССР-ни кёп къатлы чемпиону, бир ненча Олимпиадагъа, дунияны чемпионатларына да къатышып тургъан Василий Мельниковну – республикада билгенлерин, унутмагъанларын да чертип айтханды.
 - Сиз кесигиз да таурухлада айтылырча адамгъа саналасыз, Совет Союзну тау лыжа спортуну тарыхында юниорланы араларында  биринчи болуп дунияны чемпиону  болгъансыз. Бюгюнлюкде да  жаш адамла хунерликлерин спортда, илмуда, чыгъармачылыкъ ишде кёргюзтселе сюебиз, анга хар не жаны бла да себеплик этерикбиз,-деп къошханды республиканы оноучусу.