Кёп болмай КъМР-ни Сатыу-алыу палатасында  аны келечиси, «Техно-Алмаз» биригиуню таматасы Руслан Токовну башламчылыгъы бла Тюркден «TETRA MAKINE» компанияны таматасы   Хакан Каймсак эм аны коллегасы Хасан Кекес бла ишчи тюбешиу болгъанды. Къонакъла Къабарты-Малкъарда чыгъарылгъан налмас инструментлени  кеслерини установкаларында хайырланыргъа   эмда продукцияларын Россейни рыногунда сатаргъа сюйгенлерин билдиргендиле.
КъМР-ни Сатыу-алыу палатасыны таматасы  Хасан Гугетлов къыралда  къыйын экономика болумну кезиуюнде быллай байламлыкъла магъаналы эм  къыйматлы да болгъанларын белгилегенди.
- Проект  жашауда бардырылырча эмда жетишимли болурча къолубуздан келгенни аярыкъ тюйюлбюз. Бизге бу жаны бла  РФ-ни  Сатыу-алыу палатасы, КъМР-ни Правительствосу эм регионлада палатала болушурукъдула, -  дегенди Хасан Гугетлов.   
Тюрклюле «Техно-Алмазны» производствосу бла шагъырейленнгендиле. Аны  продукциясы ГОСТ-ха  келишгенин, ол бирси къыраллада чыгъарылгъанладан  артха къалмагъанын да кёргендиле. Мындан арысында байламлыкъда ишлерге сюйгенлерин да билдиргендиле.
Эсге сала айтсакъ,  «Техно-Алмазны» продукциясыны асламысы  бюгюнлюкде Россейни регионларында бла СНГ-ни  къыралларында  сатылады, деп билдиредиле Сатыу-алыу палатадан.