ФокIадэм и 3-м Къэбэрдей-Балъкъэр къэрал мэкъумэш университетым и ректорымрэ еджапIэм и унафэщIхэмрэ яхуэзащ мы гъэм япэ курсым щIэтIысхьахэмрэ абыхэм я адэ-анэхэмрэ.

- ЕджапIэм и уна­фэщIхэми егъэджакIуэхэми яхузэфIэкIыр ящIэнущ мыбы щывгъэкIуэну студент илъэсхэр фи гъащIэм гукъинэж дахэу къыхэ­нэнымкIэ, щIэныгъэ куу къыватым къищынэмы­щIауэ, зи еплъыкIэрэ зи гупсысэкIэрэ зиIэж цIыху нэс къыфхащIыкIынымкIэ, - захуигъэзащ ныбжьы­щIэхэм КъБКъАУ-м и ректор Апажэ Аслъэн.
Ректорыр къызэхуэсахэм гъэ еджэгъуэщIэмкIэ ехъуэ­хъуащ икIи къыхигъэщащ университетым и лэжьакIуэхэр адэ-анэхэм яхуэзэну сыт щыгъуи зэрыхьэзырыр, лъэныкъуитIми зыхуагъэувыжа мурадхэр зрагъэхъулIэнымкIэ апхуэдэ зэпыщIэныгъэр икъукIэ щхьэпэ зэрыхъунур.
Апажэм жиIащ Къэбэрдей-Балъкъэр къэрал мэкъумэш университетым ныбжьышхуэ имыIэми, ­лъабжьэ быдэ зэрызэригъэпэщар, езым и хабзэхэр иIэжу, зэманым декIуу адэкIи зэрызиужьыр. Апхуэдэу ар тепсэлъыхьащ университетым егъэдж­э­ныгъэ Iуэхур зэрыще­кIуэ­кIым, къэралым и мэкъу­мэш еджапIэ нэхъыфIхэм зэрыхабжэм, абы зыIэригъэхьа ехъулIэныгъэхэм. АдэкIэ ректорым утыкум ­къришащ проректорхэр, деканхэр, IэнатIэ зэмылIэу­жьыгъуэхэм я унафэщIхэр икIи дэтхэнэри къызэхуэ­сахэм яригъэцIы­хуащ.
ЗэIущIэр гуапэу екIуэкIащ. Ар гукъинэж ящищIащ Иуан Каринэ, ТхьэкIумащIэ Аслъэн, Дзэгъащтэ Анзор сымэ хэту къызэрагъэпэща концертым.