КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм и лэжьакIуэхэм, апхуэдэу щIэныгъэ нэхъыщхьэ щрагъэгъуэту ди республикэм ит еджапIэхэм я лIыкIуэхэм Тэрч щIыналъэм ит курыт школхэр къэзыуххэм къапэщылъ къэпщытэныгъэм теухуа псалъэмакъ адэ-анэхэм драгъэкIуэкIащ.
ЗэIущIэм хэтащ КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм школакIуэхэм ябгъэдэлъ щIэныгъэр къэхутэнымкIэ и секторым и унафэщI ДыщэкI Оксанэ, Тэрч щIыналъэ админист-рацэм щIэныгъэмкIэ и управленэм и унафэщI Вэрий Маринэ, Къэбэрдей-Балъкъэр къэрал, Къэбэрдей-Балъкъэр къэрал мэкъумэш университетхэм я лIыкIуэхэр, курыт еджапIэхэм я унафэщIхэр, нэгъуэщIхэри.
9-нэ, 11-нэ классхэр къэзыуххэм я адэ-анэхэм драгъэкIуэкIа псалъэмакъым хэта IэщIагъэлIхэм гулъытэ нэхъыбэ хуащIащ къэпщытэныгъэхэр щекIуэкIкIэ зытетыпхъэ хабзэхэм. Псом хуэмыдэу жып телефонхэр пэшхэм здыщIахьэ, къагъэсэбэп зэрымыхъунур, апхуэдэу тIысыпIэхэмкIэ, жэуапхэмкIэ зэхъуажэу зэрамыдэнур къыхагъэщащ. «Сабийр экзаменым зэрытхэну ручкэрэ паспортымрэ фIэкIа имыIыгъыу щIыхьэн хуейщ», - жиIащ ДыщэкI Оксанэ.
Къэпщытэныгъэхэм я пIалъэхэр, мазаем и 1-м и пэ къихуэу еджакIуэхэр адэкIэ зыхуеджэну унэтIыныгъэм ехьэлIауэ ятыну экзаменхэр къыхахыу лъэIу тхылъхэр ирагъэхьын зэрыхуейри ягу къагъэкIыжащ. Щхьэхуэу и гугъу ящIащ зи узыншагъэм дагъуэ иIэ сабийхэм зыуэ щыт къэрал экзаменхэр зэратыну щIыкIэхэм.
КъБКъУ-мрэ КъБКъМУ-мрэ къикIа IэщIагъэлIхэм къызэхуэсахэр щагъэгъуэзащ еджапIэ нэхъыщхьэхэм я къудамэхэм, абыхэм ущIэтIысхьэн папщIэ птын хуей экзаменхэм, бюджет мылъкукIэ яхуегъэджэнур зыхуэдизым.
Къыхэгъэщыпхъэщ мыпхуэдэ зэIущIэхэр адрей щIыналъэхэми зэрыщрагъэкIуэкIыр.
