|
ТекIуэныгъэкIэ ирагъажьэ.
4 февраля, 2020 - 06:56
Урысей Федерацэм футболымкIэ и етIуанэ дивизионым и «Ипщэ» гупым 2019 - 2020 гъэхэм щызэхэт зэхьэзэхуэм гъатхэпэм щыщIэзы-дзэжыну «Спартак-Налшыкым» мы илъэсым и япэ зэныбжьэгъугъэ зэIущIэр иригъэкIуэкIащ. Ди къалащхьэм и Сабий стадионым абы щыхигъэщIащ Псыхуабэ и «Мэшыкъуэ-КМВ» командэр.
ЩIышылэм и 20-м къыщыщIэдзауэ иригъэкIуэкI зыгъэсэныгъэм и япэ Iыхьэр «Спартак-Налшыкым» мэрем кIуам иухащ. Зэрыхабзэу, ар зэхуащIыжащ зэныбжьэгъугъэ зэIущIэкIэ. Абы щагъэбелджылащ иджыри къэс къайхъулIахэмрэ адэкIэ зэлэжьыпхъэхэмрэ.
Ди щIалэхэм мы гъэм япэу ныкъуэкъуэгъу къахуэхъуа Псыхуабэ и «Мэшыкъуэ-КМВ»-р Урысей Федерацэм футболымкIэ и етIуанэ дивизионым и «Ипщэ» гупым къадыхэтщ икIи очкоитхукIэ къащхьэщыкIауэ ебгъуанэ увыпIэм щыту зэхьэзэхуэр зэпагъэуащ. «Спартак-Налшыкыр» турнир таблицэм иджыпстукIэ щыепщыкIузанэщ, джэгугъуэ пщыкIуийм яужькIэ очко пщыкIубгъу зыIэригъэхьауэ.
БлэкIа лъэхъэнэм ди щIалэхэм республикэм и къалащхьэм зыщагъэсащ. Махуэм «Дыгъэпс къалэм» и стадионым, пщыхьэщхьэм «Спартак» стадионым зыщагъэхьэзыращ. Апхуэдэ мардэм тетащ «Мэшыкъуэ-КМВ»-ри. Абыхэм я зэныбжьэгъугъэ зэIущIэр нэхъыбэу зыфIэхьэлэмэтыр я тренерхэрат. Дэтхэнэми Iэмал иIащ я футболистхэм я нобэрей щытыкIэр зригъэлъагъуну, зыхагъэхьэну зыкIэлъыплъхэр ягъэунэхуну. Апхуэдэу щыт пэтми, гуапэщ «Спартак-Налшыкыр» мы гъэм и япэ зэIущIэм зэрыщытекIуар. Бжыгъэр 2:1-уэ лъэныкъуэхэр зэбгъэдэкIыжащ.
Зэныбжьэгъугъэ зэIущIэм иужькIэ, загъэпсэхуну ди щIалэхэр махуищкIэ зэбграгъэкIыжащ. Нобэ, мазаем и 4-м, ахэр Нартсанэ (Кисловодск) ежьэнущ, тхьэмахуитIкIэ щыIэну. Абы я зыгъэсэныгъэм щыпащэну я мурадщ. Дауи, зэныбжьэгъугъэ зэIущIэ зыбжани ирагъэкIуэкIынущ.
«Спартак-Налшыкым» иджыри къэс хэтахэм ядэщIыгъуу етIуанэ зэхуэсыгъуэм здашэнущ Къэбэрдей-Балъкъэрым и футбол школхэм я гъэсэн щIалэщIэ зыбжанэ. Абыхэм Iэмал хъарзынэ ягъуэтынущ ди командэм и тренерхэм гу зылърагъэтэну.
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|
27.03.2024 - 13:58 Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I |
|
27.03.2024 - 12:25 Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх |
|
27.03.2024 - 09:03 (ГъащIэ теплъэгъуэ) |
|