Энди миллет тилледе бериулеге цифра халда къараргъа онг берилликди

Къабарты-Малкъарны Къыраллыгъыны эмда Билимни кюнлерине аталгъан къууанчлы жумушлагъа РФ-ни Президентини Шимал-Кавказ федерал округда толу эркинликни келечиси, Россейни Жигити Александр Матовников да къатышханды. КъМР-ни Башчысы Юрий Коков бла бирге  полпред бир ненча объектни ачханды, жаш тёлю бла тюбешгенди.
Биринчи класслагъа келгенлеге игиликле тежегендиле
Жолоучулукъну уа ала Чегемде 1-чи номерли орта школда башлагъандыла. Келир жыл бу учреждение кесини 50-жыллыгъын белгилерикди. Быйыл а билимни эшиклери 136 жашчыкъгъа бла къызчыкъгъа ачылгъандыла.
Биринчи классха келгенлени алгъышлай, Александр Анатольевич аланы билим алыргъа, устазланы болушлукъчулары болургъа чакъыргъанды. «Бюгюн сизни арагъызда келир заманда илму жангычылыкъла этерикле, врачла, космонавтла, алимле, инженерле, аскерчиле, журналистле  болгъанларына толу ийнанама. Алай сиз алгъан  билимигизни, фахмугъузну, республиканы, Ата журтубузну айнытыугъа хайырланырыгъыз бютюнда магъаналыды»,-дегенди ол.
Полпред окъуучулагъа къуру къолла бла келмегенди. Ол саугъагъа шёндюгю компьютер бла классладан бирине мебель келтиргенди.
Юрий Коков да алгъышлагъанды школчуланы бла устазланы. Ол 1 сентябрь жашчыкълагъа бла къызчыкълагъа билимни сейир дуниясына, жетишимлеге кенг жолла ачханын чертгенди. «Бизни республикада сайлагъан усталыкъларын сюйген, профессионал устазла ишлейдиле. Устаз къуру юйретиучю тюйюлдю, ол башхалагъа юлгю болгъан адамды»,-дегенди ол.
Школчула уа къонакълагъа концерт хазырлагъан эдиле. Жаш артистле миллет тепсеуле кёргюзтюп, шёндюгю эстрада жырла айтып, таматаланы къарсларына тийишли болгъандыла.
Солуу паркда фонтан, аттракционла
Андан ары жол Нальчикде ара солуу паркга болгъанды. Байрамлагъа аталып, ол кюн аны ара аллеясында жангыртыу жумушладан сора фонтан ачылгъанды. Ол озгъан ёмюрню 50-чи жылларында ишленнгенин, кёп жылланы хайырланылмай, тозурап тургъанын белгилерчады.
 Аны жангыртыу «Формирование современной городской среды» деген федерал программаны чеклеринде бардырылгъанды. Ол санда битеу инженер коммуникацияла алышыннгандыла. Алай бек башы уа фонтанны тышы тюрлендирилмей, тарых сыфаты сакъланнганды.
 Паркда жангыртыу жумушла андан сора да тамамланнгандыла.  Ол кюн полпред бла КъМР-ни Башчысы Аттракционланы шахарчыгъында болуп, обозренияны чархында  биринчилени санында учхандыла.  Ол кёп болмай салыннганды, кеси да Шимал Кавказда бек бийикди – 50 метр.
Аттракционланы алышыргъа кереклисини юсюнден кёп кере айтылгъанды, конструкцияланы асламы озгъан ёмюрню 50-чи жылларында орнатылгъандыла, аладан бирлери эски болгъандыла, къоркъуусузлукъну жорукъларына келишмейдиле. Алай бла анда жангыртыу жумушла толтурулуп, аз-аздан шахарчыкъны объектлери  шёндюгю излемлеге келишип башлагъанды. Проект къырал-энчи партнёрлукъ мадарланы чеклеринде толтурулады.
Студентлеге - дагъыда юч окъуу корпус, телевизионщиклеге - бусагъатдагъы студия
Къабарты-Малкъар къырал университет  жангы окъуу жылгъа тынгылы хазырланнганды дерге боллукъду: тапландырыу жумушладан сора, аны юч корпусу студентлеге эшиклерин ачхандыла. Ремонтну качествосун а Александр Матовников бла Юрий Коков кёргендиле.
КъМКъУ-ну Жамауат башламчылыкъланы арасында уа къонакъла вузну тюрлю-тюрлю факультетлерини айырмалы студентлери бла тюбешгендиле. Аланы алгъышлай, Александр Анатольевич студент жылла хар адамны да эсинде жашаууну ахырына дери сакъланнганларын, ол бек сейир кезиу болгъанын чертгенди. 
-Мында 15 мингнге жууукъ студент окъуйдула. Билим алыргъа, илму бла кюреширге, конференцияла бардырыргъа битеу амалла къуралгъандыла.  Окъууну бошагъандан сора уа иш табып, билиминги  хайырланыргъа онг болгъаны артыкъда магъаналыды. Республикада уа ол жаны бла уллу иш толтурулады, -деп белгилегенди ол.
Юрий Александрович а КъМКъУ къыралда алчы вузланы санына киргенин, бу жетишимни сакъларча мындан ары да къолдан келгенни этиллигин айтханды. «Сиз жашауда тийишли жер табып, университетде алгъан билимигизни, сынауугъузну Къабарты-Малкъарны айнытыугъа хайырланырсыз деп ышанама»,-дегенди.
Студентлени уа  факультетлерини юслеринден айтыргъа, къонакълагъа соруула берирге онглары болгъанды. Сёз жаш тёлю политиканы, экономикагъа кадрланы хазырлауну, «Машук» жаш тёлю форумну юслеринден баргъанды.
 Ол кюн энтта бир къууанчлы иш болгъанды: республиканы миллет телевидениясыны жангы цифровой студиясы ачылгъанды. Анда биринчи тюзюнлей эфирни да полпред бла КъМР-ни Башчысы бардыргъандыла.
 Телевиденияда ишлегенлени шёндюгю излемлеге келишген студиягъа кёчгенлери бла алгъышлай, Александр Матовников миллет тилледе бериулени сакълау артыкъда магъаналы болгъанын чертгенди.
Юрий Коков а республика замандан артха къалмазгъа кюрешгенин, миллет телевидение цифровой амалгъа кёчерча битеу мадарла толтурулгъанларын чертгенди. «Энди жангы технологияла сингдирилгенлери бла  миллет тилледе бериуле хар юйюрге да келирге тийишлидиле»,-дегенди эмда жангыртыу жумушланы толтургъанлагъа  ыспас этгенди.
Тикаланы Фатима.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.