Мы махуэхэм ди къэралым и щIыпIэ псоми щекIуэкIащ «Блокадэ щIакхъуэ» урысейпсо фэеплъ акцэр. ЩIышылэм и 27-м, ленинграддэсхэр фашист блокадэм къикIыу хуит щыхъужа махуэм, трагъэхуа а Iуэхугъуэр даIыгъащ ди республикэм щыпсэухэми. Апхуэдэу а махуэм и фэеплъу КъБКъУ-м и библиотекэм къыщызэрагъэпэщащ «Блокадэ зращIылIа Ленинград къалэм дэсхэм я щIакхъуэ Iыхьэр» гъэлъэгъуэныгъэр.
Фэеплъ Iуэхугъуэм жыджэру хэтащ университе-тым и егъэджакIуэхэр, студентхэр, хьэщIэ гупи кърихьэлIат. Абыхэм яхэтт ди лъахэгъу усакIуэ икIи уэрэджыIакIуэ цIэрыIуэ Амирамов Ефрем. Ар къызэхуэсахэм къахуеджащ езым и усэхэм, апхуэдэуи Нева псым тет къалэ-лIыхъу-жьым епха гукъэкIыжхэм-кIэ (Амирамовыр абы куэд-рэ щыпсэуащ) ядэгуэшащ.
Эренбург Илья, Ардаматский Василий, Адамович Алесь, Берггольц Ольгэ, Ленинград блокадэм тетхыхьа нэгъуэщI тхакIуэхэм, усакIуэхэм я къалэмыпэм къыпыкIа тхылъхэр щызэхуэхьэсат гъэлъэгъуэныгъэм. Абы хэлът а гузэвэгъуэшхуэр къызэрыщыж сурэтхэри. Махуэ 872-кIэ, 1941 гъэм фокIадэм и 8-м къыщыщIэдзауэ 1944 гъэм щIышылэм и 27 пщIондэ, зи кIыхьагъ блокадэм и тхыдэм щыгъуазэ зыхуащIащ щIалэгъуалэм. Абыхэм и гукъэкIыжхэмкIэ ядэгуэшащ зи адэр а гузэвэгъуэм щыгъуэ Ленинград фронтым щызэуа, хуит къащIыжагъащIэ къалэм япэу дыхьэхахэм ящыща Яценкэ Макар ипхъу, КъБКъУ-м биологиемкIэ и кафедрэм и щIэныгъэ унафэщI Калашниковэ Любовь.
Библиотекэм и лэжьакIуэ Дал Айсанэт къызэхуэса-хэм яхутепсэлъыхьащ Чистяков Николай и «Память сердца. Ленинградские черкесы Бесленея» тхылъым. Ар теухуат Лениград къыдаша журт сабийхэр адыгэ унагъуэхэм зрашалIэурэ, я бын дыдэхэм хуагъадэу зэрапIам, адыгэ цIэ-унэцIэхэр ирату нэмыцэхэм зэрыщахъумам.
Гъэлъэгъуэныгъэм и плIанэпэхэм ящыщ зым нэрылъагъу щащIат блокадэ зращIылIауэ щыта ленинграддэсхэм ират хабзэ щIа-кхъуэр зэрапщу щыта щIыкIэр. Хьэжыгъэм нэмыщI, абы халъхьэрт сэхуран гуарци, щхьэлхэм я блынхэм кIэрищIа хьэжыгъэ сабэхэри, хьэпцIий, зэнтхъ хуэнщIейхэри, Ладогэ гуэлым щIрагъэлъэфа гуэн-хэм кърахыж гуэдз жылэ къикIыкIахэри.
Зэхуэсым кърихьэлIахэм щIакхъуэ Iыхьэ цIыкIу зырыз хуагуэшащ, блокадэм и лъэхъэнэм цIыхухэм ирату щытам хуэдиз хъууэ. КъинэмыщIауэ, гъэлъэгъуэныгъэм еплъахэм ящыщ куэдым письмо хуатхащ а къэухъуреиныгъэ хьэлъэм исахэм яхуэгъэзауэ. А тхыгъэхэр ягъэхьынущ Ленинград блокадэм щисахэм я зэгухьэныгъэм хэтхэм, ветеранхэми хуагуэшынущ.