Пятигорск къалэм и къулыкъум щыпэрыуващ Урысей Федерацэм и Президентым и полномочнэ лIыкIуэу Кавказ Ищхъэрэ федеральнэ округым щыIэ Чайкэ Юрий. Ар утыкум къришащ УФ-м и Президентым и Администрацэм и УнафэщIым и къуэдзэ Островенкэ Владимир.
ЗэIущIэм щIэсащ КъБР-м и Парламентым и УнафэщI Егоровэ Татьянэ, республикэм и Правительствэм и УнафэщI Мусуков Алий сымэ.
Мы къулыкъур иджыри къэс зыIыгъа, УФ-м и ЛъэсырыкIуэдзэхэм я главнокомандующэм и къуэдзэу ягъэува Матовников Александр Президентым и полномочнэ лIыкIуэм ехъулIэныгъэхэр иIэну ехъуэхъуащ.
Чайкэ Юрий къызэхуэсахэр щаригъэцIыхум Островенкэ Владимир жиIащ ар Iуэхум хэзыщIыкI цIыху ерыщу, жэуаплыныгъэшхуэ зыбгъэдэлъ къэрал лэжьакIуэу зэрыщытыр. Кавказ Ищхъэрэ федеральнэ округыр, жиIащ къэпсалъэм, Урысейм геополитикэ мыхьэнэ нэхъыщхьэ зиIэ и щIыналъэщ икIи иужьрей илъэсхэм мыбы шынагъуэншагъэ нэс щызэтеувэу щIидзащ. ЦIыхухэм я псэукIэр иригъэфIэкIуащ федеральнэ, щIыналъэ программэхэр тэмэму ягъэзащIэу зэрыхуежьам.
Чайкэ Юрий къыхигъэщхьэхукIащ округыр къызэрызэрагъэпэщрэ блэкIа илъэсипщIым социально-экономикэ щытыкIэр нэрылъагъуу зэрефIэкIуар, ауэ иджыри гугъуехь нэрылъагъухэр зэрыщыIэр. Абыхэм ящыщщ зэрыщы-ту къэралым елъытауэ лэжьапIэншэхэр зэрыкуэдыр, лэжьапщIэмкIэ щIыхуэ зыкъом зэрызэтрихьар, псэупIэм и IэнатIэм пыщIа мыхъумыщIагъэхэр, апхуэдэу хабзэншагъэхэм я бжыгъэм зэрыхэхъуэр. ЗэкIэ иджыри зэгугъун хуей куэд щыIэщ терроризмэмрэ экстремизмэмрэ япэщIэтыным и лъэныкъуэкIэ.
Округым и социально-экономикэ зыужьыныгъэр щIэгъэхуэбжьэным хуэгъэза проектхэр тэмэму пхыгъэкIыныр къэзылъахъэ щхьэусыгъуэ нэхъыщхьэу полномочнэ лIыкIуэм къигъэлъэгъуащ коррупцэм и Iуэхум. Абы жиIащ коррупцэм пэщIэтынымкIэ лэжьыгъэхэр щрагъэкIуэкIкIэ бюджет ахъшэр къызэрагъэсэбэпым, къэрал, муниципальнэ мылъкур зэрызэрахьэмрэ къызэрагъэсэбэпымрэ нэхъ ткIийуэ кIэлъыплъын зэрыхуейр. Къэпсалъэм къыхигъэщхьэхукIащ лъэпкъ проектхэр гъэзэщIэным пыщIауэ мылъкур къызэрагъэсэбэпыр дяпэкIэ нэхъ ткIийуэ къызэрапщытэнур.
Урысейм и Президентым и полномочнэ лIыкIуэу Кавказ Ищхъэрэ федеральнэ округым щыIэм къигъэлъэгъуащ зи чэзу Iуэхухэр япэ иригъэщын папщIэ икIэщIыпIэкIэ щIидзэу щIыналъэ псори къызэхикIухьыну зэримурадыр. Ар субъектхэм я администрацэхэм я лэжьакIуэхэм я мызакъуэу, къызэрыгуэкI цIыхухэми Урысей Федерацэм и Президентым и IуэхущIапIэ-хэм щахуэзэнущ.
- Дэ тхузэфIэкI псори длэжьынущ инвесторхэр Кавказ Ищхъэрэм и щIыналъэхэм къетшэлIэн папщIэ. Мыр щIыпIэ хьэлэмэтщ, ди цIыхухэр хьэщIэкIэ фIыщ икIи а псоми бизнесыр зэрыдахьэхыным шэч хэлъкъым. Ди округым экономикэ зэфIэкIышхуэ зэрыбгъэдэлъыр си фIэщ мэхъу, - жиIащ Чайкэ Юрий.
Апхуэдэу Президентым и полномочнэ лIыкIуэу округым щыIэм къигъэлъэгъуащ хьэрычэт Iуэху мащIэмрэ курытымрэ зегъэужьыным и нэIэ зэрытригъэтынур.
- Бизнесым и хуитыныгъэхэр хъумэным пыщIа Iуэхухэр сыт щыгъуи япэ изыгъэщхэм сащыщщ. Дэ адэкIи абы и лъэныкъуэкIэ къэдгъэсэбэпынущ бизнесменхэм зэрадэIэпыкъу хэкIыпIэ нэхъ тэмэму къэралым щызэтеувахэр, - къыхигъэщащ абы.
ЩIалэгъуалэм ядэлэжьэным щытепсэлъы-хьым, Чайкэ Юрий къигъэлъэгъуащ «Мэшыкъуэ» щIалэгъуалэ зэхыхьэшхуэр адэкIи гъэ къэс тэмэму егъэкIуэкIыным, егъэджэныгъэр егъэфIэкIуэным, технологие лъагэхэм я IэнатIэм щIэныгъэ зиIэ щIалэхэмрэ хъыджэбзхэмрэ къешэлIэным къаруушхуэ зэрырахьэлIэнур.