КъБР-м и Парламентым и еханэ зэхуэгъэсыгъуэм и деж щыIэ Жылагъуэ советым и япэ зэIущIэм а органым и тхьэмадэу Бечелов Ильяс щыхахыжащ.
КъБР-м и Парламентым и УнафэщI Егоровэ Татьянэ зэIущIэм и пэщIэдзэм къызэхуэсахэр щыгъуазэ ищIащ «УФ-м щрагъэкIуэкI жылагъуэ кIэлъыплъыныгъэм и лъабжьэхэм я IуэхукIэ» Федеральнэ законымрэ ­«КъБР-м щрагъэкIуэкI жылагъуэ кIэлъыплъыныгъэм и IуэхукIэ» КъБР-м и Законымрэ япкъ иткIэ Къэбэр­дей-Балъкъэр Республикэм и Парламентым и деж Жы­лагъуэ совет зэрыщылажьэм.
-БлэкIа зэхуэгъэсыгъуэм советыр къыщызэрагъэ­пэщауэ щытар нэхъ кIасэущ. Ауэ нобэрей Жылагъуэ советыр хахащ нэхъ ипэкIэ къащтауэ щыта Положе­-нэм ипкъ иткIэ икIи советыр къызэрызэрагъэпэщ щIыкIэм теухуауэ абы зэхъуэкIыныгъэ щхьэхуэхэр халъ­хьащ. Жылагъуэ советым хагъэхьащ Iуэхум хэ­зы­щIыкI, цIыхубэм я деж пщIэшхуэ щызиIэ IэщIагъэлIхэр, законхэр къыдэзыгъэкI, къэрал властым и гъэзэ­щIакIуэ, щIыпIэ унафэр зезыгъакIуэ органхэм, жылагъуэ зэгухьэныгъэхэм зэман кIыхькIэ щылэжьахэр, - жиIащ Егоровэ Татьянэ.
Парламентым и УнафэщIым къыхигъэщхьэхукIащ республикэм законхэр къыдэзыгъэкI и орган нэхъыщхьэм къыпэщыт языныкъуэ къалэнхэр, къэп­щы­тэныгъэ-аналитикэ лэжьыгъэм и лъэныкъуэкIэ нэхъ гулъытэшхуэ зыхуэщIыпхъэ лъэныкъуэхэр, федеральнэ законхэр гъэхьэзырыным КъБР-м и Парла­ментыр зэрыхэтыр.
ЗэIущIэм кърихьэлIахэм КъБР-м и Парламентым и деж щыIэ Жылагъуэ советым и тхьэмадэу зэдэарэ­зыуэ Бечелов Ильяс хахыжащ. Абы и къуэдзэу ягъэуващ Жырыгъу Радийрэ Михайленкэ Ольгэрэ.
ЗэIущIэм щытепсэлъыхьащ нэгъуэщI Iуэху зыбжанэми.