Илъэсым зэрыщIидзэрэ УФ-м и къэрал политикэм щрагъэкIуэкI зэ­хъуэкIыныгъэхэм къыпызыщэу уващ ПравительствэщIэ диIэ зэрыхъуар. ­УФ-м и Президент Путин Владимир Правительствэм и УнафэщIу Мишустин Михаил зэригъэувым теухуа Указым щIы­шылэм и 16-м Iэ зэрыщIидзу, Премьер-министрыр яужь ихьащ Правитель­ствэщIэр убзыхуным. Прави­тельствэм щылэжьэфыну, хуагъэув къалэнхэм пэлъэщыну къилъытэхэм я цIэ-унэцIэхэр Мишустиным къэралым и УнафэщIым хуигъэлъэгъуащ, абыхэм хэплъэу унафэ трищIыхьын папщIэ. ЩIышылэм и 21-м Путиным къыдигъэкIащ ПравительствэщIэм хэтхэр къыщыгъэлъэгъуа, дэтхэнэми и къулыкъур щыгъэбелджыла Указ.
А унафэм къызэрыщыгъэлъэгъуам ипкъ иткIэ, иджырей Правительствэм ипэкIэ лэжьам и УнафэщIым къуэдзэу пщIы иIамэ, Мишустиным ейм хэтынур бгъущ. Министрхэм я бжыгъэри зыкIэ ягъэмэщIащ.
Я къулыкъухэм трагъэкIащ вице-премьеру щытахэу Чуйченкэ Константин, Акимов Максим, Голодец Ольгэ, Гордеев Алексей, Козак Дмитрий, Мутко Виталий, министру лэжьахэу Васильевэ Ольгэ, Колобков Павел, Коновалов Александр, Котюков Михаил, Мединский Владимир, Носков Константин, Орешкин Максим, Скворцовэ Вероникэ, Топилин Максим, Чеботарёв Сергей сымэ.
Япэ вице-премьер къулыкъум ягъэуващ Президентым и чэнджэщэгъуу щыта Белоусов Андрей, вице-прьемерхэщ федеральнэ налог къулыкъущIапIэм и унафэщIым и къуэдзэу лэжьахэу Григоренкэ Дмитрийрэ Оверчук Алексейрэ, «Росреестр» IэнатIэм и унафэщIым и ­къуэдзэу щыта Абрамченкэ Викторие, Москва къалэм и Iэтащхьэм и къуэдзэу лэжьа Хуснуллин Марат, «Газпром-медиа»-м и правленэм и Iэтащхьэ къулыкъум пэрыта Чернышенкэ Дмитрий. ТекIа Правительствэм и вице-премьерхэу щытахэу Трутнев Юрий, Голиковэ Татьянэ, Борисов Юрий сымэ иджыри апхуэдэ дзыхь хуащIри, я къулыкъухэр къыхуа­гъэнэжащ.
Къарузехьэ IэнатIэхэм къулыкъухэр щызыIыгъахэри трагъэкIакъым - Шойгу Сергей зыхъумэжыныгъэмкIэ, Колокольцев Владимир къэрал кIуэцI IуэхухэмкIэ, граждан зыхъумэжыныгъэмрэ къы­зэрымыкIуэ щытыкIэхэмкIэ IэнатIэм Зиничев Евгений я министрщ. Лавров Сергеи къытенэжащ нэхъапэм зи унафэ ищIу щыта, Къэрал щIыб IуэхухэмкIэ министерствэм, юстицэмкIэ министру ягъэуващ Правительствэм и Аппаратым и УнафэщI къулыкъур зезыхьа Чуйченкэ Константин.
Экономикэ IэнатIэм унафэ хуэзыщIынухэр: финансхэмкIэ министр Силуанов Антон (япэ вице-премьеру щытащ), экономикэ зыужьыныгъэмкIэ министрыр Пермскэ крайм и губернатору лэжьа Решетников Максимщ. Мантуров Денис промышленностымрэ сатумкIэ, Патрушев Дмитрий мэкъумэш хозяйствэмкIэ, Новак Александр энергетикэмкIэ ми­нистр къулыкъухэм къытенэжащ.
ЗэхъуэкIыныгъэ нэхъыбэ къыщыхъуа­хэм ящыщщ социальнэ IэнатIэр. Министру мылэжьауэ ягъэуващ Мурашкэ ­Михаил - узыншагъэр хъумэнымкIэ, Кравцов Сергей - цIыхухэр егъэджэнымкIэ, ­Фальков Валерий - щIэныгъэмрэ цIыхухэм щIэныгъэ нэхъыщхьэ егъэ­гъуэтынымкIэ, Любимовэ Ольгэ - щэнхабзэмкIэ, Матыцин Олег - спортымкIэ. Нэ­хъапэм зытета къулыкъухэм къытенэжащ щIыуэпс хъугъуэфIыгъуэхэмрэ дыкъэзыухъуреихь дунеймкIэ министр Кобылкин Дмитрий, транспортымкIэ - Дитрих Евгений, ухуэныгъэмрэ псэупIэ-коммунальнэ хозяйствэмкIэ - Якушев Владимир сымэ. ЛэжьыгъэмкIэ министру ягъэуващ финансхэмкIэ министрым и къуэдзэу щыта Котяков Максим, бжыгъэр зи лъабжьэ зыужьыныгъэмкIэ, связымрэ цIыхубэ коммуникацэхэмкIэ министрщ «Рос­телеком»-м и вице-президенту щыта ­Шадаев Максут.
Правительствэм и зэхэтыкIэм игъуэта зэхъуэкIыныгъэхэм ящыщщ Кавказ ­Ищхъэрэм и IуэхухэмкIэ министерствэр иджы зэрыщымыIэжыр. КъуэкIыпIэ Жыжьэмрэ Арктикэмрэ зегъэужьынымкIэ министерствэм и унафэщI къулыкъур къыхуэнэжащ Козлов Александр.
Медведев Дмитрий и унафэм щIэту Правительствэм щылэжьахэу иджырейм хамыгъэхьахэм ящыщ куэдым нэгъуэщI къулыкъухэр хуагъэлъэгъуакIэщ. Псалъэм папщIэ, Мединскэмрэ Орешки­нымрэ къэралым и Президентым и чэнджэщэгъуу, Козак Дмитрий УФ-м и Президентым и Администрацэм и Унафэ­щIым и къуэдзэу ягъэуващ.
Путин Владимир Федеральнэ Зэхуэсым Зэрызыхуигъэзам къыщигъэлъэгъуа Iуэхухэр гъэзэщIэным пэлъэщыну гуп щызэщIагъэуIуауэ жыпIэ хъунущ процент 52-кIэ къагъэщIэрэщIэжа Правительствэм - апхуэдэу къалъытэ зэхъуэкIы­ныгъэхэм кIэлъыплъ политологхэм я нэхъыбэм икIи щогугъ цIыхубэм я псэукIэр езыгъэфIэкIуэну IуэхуфIхэр абыхэм яхузэфIэкIыну.