Ди республикэм щагъэлъэпIащ ди цIыхухэм я дежкIэ мыхьэнэшхуэ зиIэ пIалъэр - КъБР-м и дзэ комиссариатыр къызэрызэрагъэпэщрэ илъэси 100 зэрырикъур. Налшык къалэм дэт къэрал концерт гъэлъэгъуапIэм абы теухуауэ къыщызэрагъэпэща гуфIэгъуэ зэIущIэм хэтащ республикэм и дзэ комиссариатхэм я лэжьакIуэхэмрэ ветеранхэмрэ. Апхуэдэу гуфIэгъуэм кърихьэлIащ КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м и Парламентым и УнафэщIым и къуэдзэ Жанатаев Сэлим, республикэм законхэр къыдэзыгъэкI и орган нэхъыщхьэм и депутатхэр, гъэзэщIакIуэ властым и органхэм, щIыпIэ унафэр зезыгъакIуэ органхэм, хабзэхъумэ IэнатIэхэм, дин зэгухьэныгъэхэм я лIыкIуэхэр, дзэ частхэм я унафэщIхэр, ветеранхэм я зэгухьэныгъэхэм хэтхэр.
дзэ комиссариатхэм я лэжьакIуэхэмрэ ветеранхэмрэ юбилей гуфIэгъуэмкIэ ехъуэхъуащ КъБР-м и дзэ комиссар подполковник Пахомов Дмитрий. ФIыщIэ псалъэхэр абы яхужиIащ блэкIа илъэсхэм дзэ комиссариатхэм къулыкъу щызыщIахэмрэ щылэжьахэмрэ, иджыпсту а IэнатIэм хьэлэлу бгъэдэтхэм.
Докладым къызэрыхэщамкIэ, Къэбэрдей-Балъкъэрым и областной дзэ комиссариатыр 2020 гъэм щIышылэм и 20-м къызэрагъэпэщауэ щытащ. Абы и лэжьыгъэм хиубыдэрт дзэм ираджэну къызыпэщыт щIалэгъуалэмрэ дзэ къулыкъур езыхьэкIауэ запасым щыIэхэмрэ къитхыкIыныр, транспортыр, шыхэр учётым гъэувыныр, зыхуэфащэхэр и зэманым дзэ къулыкъум гъэкIуэныр, зыхъумэжыныгъэм цIыхухэр хуэгъэсэныр. Граждан зауэм и лъэхъэнэм а псоми икъукIэ мыхьэнэшхуэ яIэт.
Зэи хуэмыдэжу дзэ комиссариатхэм къалэн инхэр къабгъэдэхуащ Хэку зауэшхуэр къэхъея нэужь. Япэ махуэхэм къыщыщIэдзауэ республикэм и дзэ комиссарым лэжьыгъэшхуэ иригъэжьащ Къэбэрдей-Балъкъэрым и щIыналъэм зыхъумэжыныгъэмкIэ ухуэныгъэхэр щегъэкIуэкIыным цIыхухэр хузэщIагъэуIуэным хуэгъэзауэ. Апхуэдэу 115-нэ шуудзэ дивизэр къызэрагъэпэщу хуежьащ. Республикэм икIа зауэлIхэр фронт псоми щыIащ, абыхэм ящыщ куэд Берлин нэсащ, ТекIуэныгъэр абы щагъэлъэпIащ.
Къэралым мамыру щыпсэу иджырей лъэхъэнэм, жиIащ Пахомов Дмитрий, КъБР-м и дзэ комиссариатым и къалэн нэхъыщхьэхэм ящыщщ гузэвэгъуэ къыщыхъуам деж цIыхухэмрэ транспортымрэ псынщIэу зэщIэгъэуIуа зэрыхъунум елэжьыныр, зи ныбжьыр нэсахэр дзэм гъэкIуэныр, контракткIэ къулыкъу зыщIэнухэр къыхэхыныр. Апхуэдэу мы IуэхущIапIэм гулъытэшхуэ хуещI дзэ еджапIэ нэхъыщхьэхэм щIэтIысхьэнухэр къыхэхыным, щIалэгъуалэр хэкум хуэпэжу гъэсэным, нэгъуэщIхэми.
КъБР-м и Iэтащхьэм и Администрацэм и УнафэщI Къуэдзокъуэ Мухьэмэд зэIущIэм къыщеджащ КъБР-м и Iэтащхьэ КIуэкIуэ Казбек и хъуэхъум. «КъБР-м и дзэ комиссариатым и лэжьакIуэхэмрэ ветеранхэмрэ си гуапэу сохъуэхъу гуфIэгъуэ пIалъэмкIэ - а къулыкъущIапIэр къызэрызэрагъэпэщрэ илъэсищэ зэрырикъумкIэ. Япэ махуэхэм къыщыщIэдзауэ республикэм и дзэ комиссариатыр елэжьащ IэщэкIэ зэщIэузэда къарухэм я зэфIэкIыр къэIэтыным, зыхъумэжыныгъэм и лъэныкъуэкIэ къэралым и лъэщагъым хэгъэхъуэным хуэгъэза Iуэхушхуэхэм. Гъэунэхуныгъэ хьэлъэу абы и дежкIэ щытащ Хэку зауэшхуэм и илъэсхэр. Военкоматым куэд зэфIигъэкIащ Дзэ Плъыжьым и частхэмрэ соединенэхэмрэ зэщIэгъэуIуэнымкIэ, ахэр фронтым гъэкIуэнымкIэ, дзэхэр зыхуей-зыхуэфIхэмкIэ къызэгъэпэщынымкIэ. Нобэ КъБР-м и дзэ комиссариатым къулыкъу щызыщIэхэм япэ итахэм я хабзэ хьэлэмэтхэр ягъэбыдэ, къабгъэдэхуэ къалэнхэр щIыхь пылъу ягъэзащIэ, щIалэгъуалэр дзэ къулыкъум хуагъэхьэзыр, ветеранхэмрэ абыхэм я унагъуэхэмрэ ядоIэпыкъу.
Мы гуфIэгъуэ махуэм фIыщIэ фхузощI хьэлэлу фи къулыкъур зэрефхьэкIым икIи къыхэфха IэнатIэм пэжыгъэкIэ фызэрыбгъэдэтым папщIэ. Си гуапэу сынывохъуэхъу узыншагъэ быдэ, ефIэкIуэныгъэ фIыщIэ фиIэну, Хэкум къулыкъу хуэщIэнымкIэ къалэным фехъулIэну», - итщ абы.
Къуэдзокъуэ Мухьэмэд КъБР-м и ЩIыхь тхылъыр Налшык къалэм и дзэ комиссар Щоджэн Залым, къалэ комиссариатым и къудамэм и унафэщI Сурневэ Аллэ сымэ яритащ. Апхуэдэу КъБР-м и Правительствэм и фIыщIэ тхылъыр цIыху зыбжанэм хуагъэфэщащ.
КъБР-м и Парламентым и УнафэщIым и къуэдзэ Жанатаев Сэлим къеджащ КъБР-м и дзэ комиссариатым и лэжьакIуэхэм республикэм и Парламентым и ЩIыхь тхылъыр етыным теухуауэ республикэм законхэр къыдэзыгъэкI и орган нэхъыщхьэм и президиумым къищта унафэм. Абы ипкъ иткIэ наградэхэр хуагъэфэщащ комиссариатым и къудамэхэм я унафэщIхэу Мэрзей Хьэдис, Балаев Алим, Шрамко Алексей сымэ.
ЗэIущIэм и кIэухым абы хэтахэм я нэгу зрагъэужьащ республикэм и къэфакIуэ, уэрэджыIакIуэ гуп нэхъыфIхэм хэтхэм, Кавказ Ищхъэрэм ГъуазджэхэмкIэ и къэрал институтым музыкэм щыхурагъаджэ и кадет корпусым и гъэсэнхэм.