Хэку зауэшхуэр ди ТекIуэныгъэкIэ зэриухрэ мы гъэм илъэс 75-рэ зэрырикъум и щIыхькIэ Тэрч щIыналъэм мыхьэнэ ин зиIэ акцэ щрагъэкIуэкIащ. Iуэхум и къалэн нэхъыщхьэу щытар къыдэкIуэтей щIэблэр хэкупсэу гъэсэнырт.
Къэбэрдей-Балъкъэрыр нэмыцэхэм къыщыIэщIагъэкIыжа махуэхэм ирихьэлIэу, Курп лъагапIэхэм дэкIащ районым щылажьэ жылагъуэ, щIалэгъуалэ зэгухьэныгъэхэм я лIыкIуэхэр, щIыпIэм щыIэ ДОСААФ-м и юнармейцхэмрэ курсантхэмрэ, школакIуэхэр, къуажэдэсхэр.
Апхуэдэу Iуэхум хэтащ Тэрч щIыналъэ администрацэм и унафэщI Дадэ МуIэед, абы и къуэдзэ Семэн Пщыкъан, УФ-м и ДОСААФ-м КъБР-м щиIэ къудамэм и унафэщI ЗэкIуий Мухьэжид, а IуэхущIапIэм и Советым и унафэщI МацIыхъу Хъусен сымэ, нэгъуэщIхэри.
Инарыкъуей къуажэм щыщу Хэку зауэшхуэм хэкIуэдахэм я фэеплъым деж щызэхэта пэкIум къыщыпсэлъащ Дадэ МуIэедрэ ЗэкIуий Мухьэжидрэ. Абыхэм къызэхуэсахэм ягу къагъэкIыжащ 1942 гъэм и бжьыхьэм щIидзэу Мэлгъэбэг щегъэжьауэ Курп лъагапIэм нэсыху зауэ гуащIэ щекIуэкIауэ зэрыщытар. ЩIыпIэм щызэуа 317-нэ фочауэ дивизэр тIэунейрэ зэрагъэпэщыжат. Хэкум и щхьэхуитыныгъэм папщIэ офицерхэу, сэлэту миниблым щIигъум а лъагапIэхэм я псэр щатащ. 1943 гъэм и илъэсыщIэ жэщым щегъэжьауэ нэмыцэхэр ирагъэкIуэтын щIадзэри, ди сэлэтхэм щIыналъэр хуит къащIыжащ.
Къэпсэлъахэм къыхагъэщащ къытщIэхъуэ щIэблэр я лъахэр фIыуэ ялъагъуу къэгъэтэджын папщIэ мыпхуэдэ зэхыхьэхэм мыхьэнэшхуэ зэраIэр, апхуэдэхэр къызэгъэпэщыным гулъытэ нэхъыбэ зэрыхуэщIыпхъэр икIи мы илъэсым и кIуэцIкIэ иджыри зэIущIэ зыбжанэ ирагъэкIуэкIыну зэрамурадыр.
Акцэр щекIуэкIа махуэр уаеу, жьы щIыIэ щIэту уэс къесу апхуэдэт. КъызэгъэпэщакIуэхэми Iуэхум хэтахэми зэрыжаIамкIэ, шэч хэлъкъым Курп лъагапIэхэм папщIэ екIуэкIа зауэм хэкIуэдахэм я фэеплъым нэсыху дэкIахэм я Хэкум и щхьэхуитыныгъэр яхъумэу нэмыцэхэм япэщIэта зауэлIхэм ятелъа бэлыхьымрэ хьэзабымрэ щыщу зымащIэ нэхъ мыхъуми зэрызыхащIам.