Бу къышда республикада федерал трассаланы тазалауда 50-ден артыкъ нчи жол техника хайырланыллыкъды, деп билдиргендиле къырал жоллагъа къарагъан «Кавказ» Управлениядан. Ведомствода айтханларыча, аны специалистлери къышха бек тынгылы хазырланнгандыла; жоллада ары дери табылгъан кемчиликлени кетергендиле, техникагъа, ол санда автогрейдерлеге, экскаваторлагъа, бульдозерлеге, ауур жюкле ташыгъан эмда къарны тазалагъан машиналагъа тийишлисича къарагъандыла, бузлагъан жолгъа жаярча туздан бла юзмезден да 20 тоннадан аслам къыстырыкъ этгендиле. Техниканы юсюнден айтханда, ала бары да «ГЛОНАСС» терминалла бла жалчытыныпдыла, деп чертгендиле Управленияда.
Трассаланы къатларында дежурство бардырырча жети пункт эмда тёрт стоянка къуралгъанды. «Кавказны» специалистлери МЧС-ни, ГИБДД-ны, Гидрометеорология управленияны бёлюмлери бла байламлыкъда ишлейдиле, 50 метеостанциядан келген информацияны да хайырлана, жоллада болумгъа дайым кёз-къулакъ болгъанлай турадыла. Водительлеге да сакъ болургъа, эслеген кемчиликлерини юсюнден а Управленияны диспетчер службасына бу номер бла сёлеширге чакъырадыла: +7 (8793) 33-11-59 .