Угар газ бек уулу затха саналады. Адамны ёпкелерине тюшсе, терк окъуна къаннга сингип, анда гемоглобиннге жабышады. Аны хатасындан а кислород бла жалчытыу тыйылады, дейдиле «Газпром межрегионгаз Нальчик» компанияны специалистлери.
Бу зат бла ууланнганны биринчи ышанлары быладыла: адамны башы ауруп тебирейди, кёлю аман этип башлайды, кёзю-башы тёгерек айланады, атлагъаны, къымылдагъаны къыйын болады, терк-терк солуп, къургъакъ жётел этип тебирейди. Аланы сынагъан адам не да этип башын тышына чыгъарыргъа керекди, алай, жарсыугъа, кёбюсюнде алайда жеринде таянады. Угар газ а кесини мурдарлыкъ ишин бек терк этеди…
Тюз да ол затла эсленнгенлей, олсагъат окъуна отоулада эшиклени, терезелени кенг ачып, хауаны тазаларгъа керекди. Ызы бла мычымай газ оборудованиягъа къарап, аны ёчюлгенин неда ёчюлмегенин тохташдырыргъа. Хауада газны ийиси сезиле эсе, чыракъланы жандырыргъа неда сирнек къабындырыргъа арталлыда жарамайды – ол уллу хатагъа келтирирге боллукъду. Терк окъуна 04 номер бла газ службагъа сёлеширге керекди, 03 номер бла уа - терк медицина болушлукъ бергенлеге.
Угар газдан ууланнган адамны отоудан не къадар терк тышына чыгъарыргъа керекди. Кесин да тили артха кетмез ючюн бауур тёбен жатдырыргъа. Хали тап болгъанча кёрюннгенликге, аны врачха кёргюзтмей жарамайды.
Быллай газ бла ууланмаз ючюн, отоуланы жылытама деп печьлени неда духовой шкафланы бошуна ишлетмегиз! Конфоркаланы барын да бирча жандырып туруу печьни кесине, ол отоуда тургъан адамлагъа да иги тюйюлдю. Дагъыда газ колонканы ванныйде орнатыргъа керекмейди. Ожакъланы уа дайым тазалап турургъа тийишлиди.
Газ сары жана эсе, ол прибор тапсыз ишлегенин билигиз. Плита, котёл, колонка орналгъан отоулагъа таза хауа келип турургъа керекди. Ол себепден форточкаланы ачаргъа тийишлиди.
Газ оборудованиягъа кесигиз ремонт этерге кюрешмегиз, ол тийишли специалистни ишиди. Уллу басым бла сыналып кёрюлмеген эмда хайырланыу болжалы бошалгъан газ баллонланы да абериге жаратыргъа жарамайды. Ожакъда тартыу иги болгъанын бла къалгъанын къагъытны жандырып, котёлну аллында тешигине жууукълашдырып кёрюрге боллукъду. Тартыу жокъ эсе, неда аны къоркъуусузлукъ автоматикасы тап тюйюл эсе, котёлну ишлетирге жарамайды. Юйде неда тышында хауада не аз да газ ийис сезиле эсе, тийишли службагъа сёлеширге керекди.
