Кёп болмай Нальчикни 1-чи номерли клиника больницасында бауурунда онкологиясы болгъан саусузгъа операцияны жангы тюрлюсю этилгенди. Аны Москвада Н. Семашко атлы жол клиника больницаны радиохимия амалла бла диагностика бардыргъан эм бакъгъан бёлюмню таматасы Герман Докшоков бла шахарны сагъынылгъан больницасыны онкология эм малоинвазив хирургия бёлюмюню таматасы Беслан Балкаров бардыргъандыла. Аны чеклеринде рентген-контроль аппарат бла саусузну бауурунда метастазагъа химиоэмболизация этилгенди.
Химиоэмболизация–ол ракдан бакъгъан амалладан бириди. Аны кезиюнде ауруу болгъан жерге баргъан къан тамырланы къысдырып, ауругъан жерине химиотерапия веществоланы жибередиле. Аллай амал адамны башха органларына азыракъ заран салады. Алай бла, кислород орунуна химия дарман барса, аман клеткала терк ёледиле. Операциядан сора саусузну хали игиге айланнганды, аны юйюне жибергендиле, деп билдириледи КъМР-ни Саулукъ сакълау министерствосуну пресс-службасындан.