РФ-ни Конституциясыны кюнюне жоралап, КъМР-ни Парламентинде окъууда, спортда, жамауат жашауда жетишимли жаш адамлагъа паспортларын бериу ариу тёреге айланнганды. Тюнене уа 22 жаш бла къыз жашауларында баш документлерин Парламентни спикери Татьяна Егорованы бла аны орунбасары Мурат Кардановну къолларындан алгъандыла.
Татьяна Борисовна, жаш адамланы бла аланы ата-аналарын быллай къууанчлы кюн бла алгъышлай, тюбешиу РФ-ни Конституциясыны кюнюне жораланнганын, ол къыралда баш магъаналы документ болгъанын чертгенди.
- Сиз бу кюнню ашыгъып сакълагъан болурсуз деп ышанама. Кёзлеригизге къарай, кёлюгюз толгъанын кёрюп турама. Аны да ангыларчады, бюгюн Россейни инсаныны баш документин аласыз, алай бла уа сизге жашауну кенг жоллары ачыладыла. Паспортла бла бирге къыралыбызны, республиканы, ата-аналарыгъызны, устазларыгъызны алларында жууаплылыкъны да алгъансыз. Энди сиз деменгили Ата журтубузну толу эркинликли инсанлары болгъансыз, - дегенди ол.
Спикер паспортланы бериу ариу тёреге бурулгъанын, быллай жыйылыулада жаш тёлю бла тюбеширге онг болгъанын да айтханды. «Бюгюн мында окъууда, спортда, культурада, жамауат жашауда жетишимли жашла бла къызла жыйылгъансыз. Жашауугъузда биринчи магъаналы атламны этгенсиз, мындан ары да туугъан Къабарты-Малкъарны, Россейни саулайда айныууна битеу фахмугъузну, тирилигигизни аямазсыз деп ышанама. Россейни инсаны деген сыйлы атны ёхтемлик бла жюрютюгюз»,-дегенди ол.
Мурат Карданов да къошулгъанды алгъышлаулагъа. «Сизге къарап турама да, быллай тири, хунерли жаш тёлюбюз бар эсе, биз жетишимли боллугъубузгъа ишеклик жокъду»,-дегенди эмда ата-аналагъа сабийлерин окъутуугъа, юйретиуге салгъан къыйынлары ючюн жюрек ыразылыгъын айтханды.
