Тюнене Правительствону юйюнде КъМР-ни Башчысы Казбек Коков Къабарты-Малкъар Республиканы Наркотиклеге къажау комиссиясыны жыйылыуун бардыргъанды. Аны ишине КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, КъМР-де баш федерал инспектор Тимур Макоев, шахар эм район администрацияланы башчылары, право низамны сакълаучу эмда кюч къурамланы келечилери да къатышхандыла.
Кенгешде «КъМР-де саулукъ сакълауну айнытыу» къырал программа 2019 жылда къалай толтурулгъанына къаралгъанды, быйылны тогъуз айында Къабарты-Малкъарда наркотикле бла байламлы болум сюзюлгенди, келир заманнга борчла салыннгандыл
Республиканы тийишли органлары наркотиклени жайылыуларын тыяр ючюн тюрлю-тюрлю мадарла этедиле, ол санда къайдан жиберилгенлери, бизге къалай бла ётдюрюлгенлери ачыкъланады, наркопритонла туура этилип, жабыладыла, ууну Интернетни юсю бла сатханла бла къаты кюреш барады. Андан сора да, наркоманланы багъыу, аланы саулукълу жашаугъа къайтарыу жаны бла мадарла этиледиле деп, Казбек Коков аны бла бирге республикада ол жаны бла хал осаллай къалгъанын айырып айтханды.
Регионда наркотиклени законсуз сатыу бла байламлы аманлыкъланы саны уллулай къалады. Адамны башын хайран этген затла акъылбалыкъ болмагъанланы араларында асыры бек жайылгъанлары бютюнда тынгысыз этдиреди. Наркоманиядан ауругъанладан кеслерине бакъдыргъанла аздыла. Анга кёре профилактика ишни кючлендирирге, наркология жаны бла специалистлени хазырларгъа, ала саулукъ сакълауну, билим бериуню бёлюмлеринде, жамауат организациялада, волонтёрланы араларында да болурча этерге кереклиси эсгертилгенди.
Тюбешиуню ахырында КъМР-ни Правительствосуна 2021-2025 жыллагъа наркотиклеге къажау къырал программаны жарашдырыргъа, тийишли органлагъа уа – ведомстволаны бла жер-жерлени араларында бирге ишлеуню къурау жаны бла мадарла этерге, оператив-профилактика ишни селейтмезге, адамны башын хайран этген дарманланы законсуз сатыуну жолун кесерге, ала окъуу юйлени тийрелеринде, жаш тёлю аслам жыйылгъан жерледе жайылмазларына къаты контроль этерге буюрулгъанды.
Жыйылыуда КъМР-ни саулукъ сакълау министри Рустам Калибатов, КъМР-де ич ишлени министрини орунбасары Назир Мамхегов, КъМР-ни жарыкъландырыу, илму эмда жаш тёлюню ишлери жаны бла министрини къуллугъун толтургъан Ауес Кумыков, Прохладный шахар округну бла Бахсан районну администрацияларыны таматалары Игорь Тараев бла Артур Балкизов сёлешгендиле.
