Нальчикде КъМР-ни Башчысы Казбек Коков республиканы Правительствосуну таматалары эм келечилери бла «контроль сагъат» бардыргъанды. Баш темаланы араларында – миллет проектлени  толтуруу эм аланы регион кесеклеринде тийишли кёрюмдюлеге жетиу. Миллет проектлени регион кесеклерин толтуруу жаны бла юч жылларына дери жыл сандагъы сабийлеге 1 декабрьге 18 блок-яслини къурулушлары тындырылып, аланы жашаугъа кийирирге эркинлик берилгенди, Аушигер элде футбол ойнарча гитче халлы майдан, Атажукинода стадион, Саратовское хуторда фельдшер-акушер пункт, Сармаково элде суу жалчытыу ызны ишлери тамамланнгандыла. «Таза суу» регион проектни чегинде Белоглинское эм Дальнее элледе суу ызла ишленнгендиле.
Андан сора да, саулукъ сакълауну, билим бериуню, спортну, маданиятны, социал бёлюмню 123 объектлерини улоу, башха керек затла жаны бла болумлары игилендирилгенди. Тап халгъа 145 арбаз эм 28 жамауат тийре келтирилгендиле.
Кенгешни чегинде Минги тау тийресинде турист инфраструктураны тийишли кезиуге хазырлыгъы, социал магъаналы объектлени жашаугъа кийириу, жол мюлкде бардырылгъан ишлени эсеплери сюзюлгендиле.
Повестканы соруулары бла байламлы КъМР-ни Правительствосуну Председатели Мусукланы А.Т., КъМР-ни Правительствосуну Председателини биринчи орунбасары С.А. Говоров, КъМР-ни Правительствосуну Председателини орунбасары М.А. Кунижев, КъМР-ни транспорт эм жол мюлк министри А.З. Дышеков, КъМР-ни экономиканы айнытыу министрини къуллугъун толтургъан Рахайланы Б.М., КъМР-ни курортла эм туризм министрини къуллугъун толтургъан М.Л. Шогенцуков сёлешгендиле.