КъМР-ни Правительствосуну башчысы Мусукланы Алий тюнене бардыргъан кезиулю жыйылыуда министерствола жарашдыргъан жыйырмадан артыкъ бегимлени проектлерине къарагъанды. Кенгешге жер-жерли администрацияланы эмда бир талай ведомстволаны бла службаланы келечилери да къатышхандыла.
Аслам эс Правительствону башчысыны биринчи орунбасары - эл мюлк министр Сергей Говоров сюзюуге чыгъаргъан проектге бурулгъанды. Сёз анда республиканы аш-азыкъ жаны бла къоркъуусузлугъун жалчытыуну юсюнден барады. Сергей Говоров айтханнга кёре, 2012 жылда 20 мартда аны юсюндензакон къабыл этилген эди. Анда, ол санда, продовольствиеден къыстырыкъ этиу фондну къураргъа кереклиси белгиленеди. Алай ол замандан бери республика онглуракъ болгъанды, сагъынылгъан борч а талай программаланы чеклеринде окъуна тамамланады. Сёз ючюн, болжалы 2014-2020 жыллагъа белгиленнген «Эл мюлкню айнытыу, эл мюлк продукцияны, сырьёну эмда талай белгили продуктланы рынокларын тийишдириу» программаны чеклеринде республикада жашагъанланы барын да (медицина кёрюмдюлеге тийишлиликде) толусунлай жалчытырча аллай бир продукция чыгъарылады.
Къыралны юг регионларында бардырылгъан тинтиуле Шимал - Кавказ федерал округда, Ростов, Астрахань эмда Волгоград областьлада бюгюнлюкде быллай фондла болмагъанын кёргюзтгендиле. Аланы къураудан хайыр болмагъаны ючюн Ставрополь эмда Краснодар крайлада 2012 жылда окъуна кетерген эдиле.
Алай бла, сагъынылгъан шартланы барын да эсге алып къарагъанда, республикада быллай фондну тутхандан хайыр жокъду дерге боллукъду. Нек дегенде Къабарты-Малкъарда мирзеуден жыйырма кюнлюк къыстырыкъ тутарча, бюджетден 60 миллион сом къоратыргъа тюшеди. Фонд кетерилсе уа, будайны, керек заманда РФ-ни къырал резерв фондундан сатып алыргъа боллукъду. Бу айны аллында, министр билдиргеннге кёре, анда будайдан тёрт миллион тонна бар эди.
КъМР-ни экономиканы айнытыу министри Рахайланы Борис Къабарты-Малкъар Республиканы 2034 жылгъа дери Инвестициялы стратегиясын къабыл этиуню юсюнден сёлешгенди. Аны магъанасы - 2013 жылдан бери болгъан тюрлениулени эсге алыргъа эмда Стратегияны талай кесеклерин толуракъ белгилерге кереклиси бла байламлыды. Быллай тюрлениулени сингдириуню сылтауу да баямды – республика тап инвестициялы болумну къурау жаны бла онеки излемни тамамлауну боюнуна алгъаны.
Къырал Думаны депутаты, Россей Федерацияны Спорт туризм жаны бла федерациясыны таматасы Сергей Мироновну обращениясын дурус кёрюп, къыралны башчысы Владимир Путин спорт туризмни онгдурурча тийишли оноу этгенди. «Сёз анда мюлк бла себеплик этиуню юсюнден барады», - деп, КъМР-ни жер эм ырысхы бла байламлы халла министрини къуллугъун толтургъан Уяналаны Таймураз ведомство аны бла байламлы хазырлагъан проектни туура этгенди. Анга кёре республиканы Альпинизм, къаялагъа ёрлеу эмда спорт туризм федерациясына хакъсыз хайырланыугъа Нальчикде, Шогенцуков атлы проспектде мекямладан бири бериледи.
Министрни къуллугъун толтургъан дагъыда Зольск районда республиканы иелигинде болгъан суу быргъыны муниципалитетге хакъсыз берирге оноу этилгенин айтханды. Ол быргъы бла таза суу барады, аны узунлугъу 27,4 километр болады, багъасы уа 822 миллион сомду.
Кенгешде энтта да талай бегимни проектлери бла энди ишленирик «Этана» промышленность комплекс тёгерек-башха къаллай заран салыргъа боллугъун тинтген къауумну къураргъа, бир ненча категория гражданлагъа социал тёлеулени жетдириуню качествосун игилендирирге, сакъат болгъан жаш адамлагъа окъургъа эмда ишге орналыргъа себеплик этерге, келир жыл республикада Театрны жылын бардырыргъа жууаплы къурау комитетни къауумун тохташдырыргъа оноулашхандыла. Дагъыда КъМР-де миллет чыгъармачылыкъланы сакълау, жангырыу эмда айнытыу планын къабыл этгендиле, сакъатланы эмда саулукъларында чекленнген онглары болгъанланы араларында бардырылгъан миллет эмда халкъла аралы эришиуледе хорлагъанланы бла алчы болгъанланы онгдуруу жорукъланы да дурус кёргендиле. Ахырында КъМР-ни урунуу эмда социал къоруулау министри Асанланы Алим республикада пенсиячыла бла байламлы жашау этерге жараулу ахчаны ёлчеми Россейде аны орталыкъ ёлчеми бла тенг боллугъун билдиргенди. Пенсияны юсюне къошулуп берилген социал тёлеуню ёлчеми да анга кёре тергеледи.
