ЩIДАА-м и академикыу, Урысей ­Федерацэм цIыхухэм щIэныгъэ нэхъыщхьэ егъэгъуэтынымкIэ, Къэбэрдей-Балъкъэр Республикэм щIэныгъэмкIэ щIыхь зиIэ я лэжьакIуэу, ­РАЕН-м и член-корреспонденту, КъБКъУ-м Химиемрэ биологиемкIэ и институтым неорганическэ, физическэ химиемкIэ и кафедрэм илъэс куэдкIэ и унафэщIу щыта, химие щIэныгъэхэм я доктор, профессор Шурдым Гъэзалий Къасбот и къуэм и фэеплъ пшыхь щекIуэкIащ Къэбэрдей-Балъкъэр къэ­рал университетым.
Абы кърихьэлIат КъБР-м и Парламентым и депутат Щхьэгъэпсо Сэфарбий, КъБКъУ-м стратегие зыу­жьы­ныгъэмрэ лъэпкъ зэпыщIэныгъэхэмкIэ и проректор ­Къущ­хьэ Хъусен, химиемрэ биологиемкIэ институтым и унафэщI Хъурей Арсен, еджапIэ нэхъыщхьэм неорганическэ, физическэ химиемкIэ и кафедрэм и доцент Шэрджэс Заур, ­КъБР-м и лъэпкъ хозяйствэм и тхыдэмкIэ кафедрэм и унафэщI Эфендиев Сэлихь, хъыбарегъащIэ технологиехэмкIэ колледжым и унафэщI Нэхущ ФатIимэ сымэ, щIэныгъэлIым и Iыхьлыхэр, и ныбжьэгъуу, къыдэлажьэу щытахэр.
ЗэIущIэм япэу къыщыпсэлъа Къущ­хьэ Хъусен жиIащ: «Гуапэу дигу къыдогъэкIыж химие щIэныгъэм лъэужь ­дахэ къыхэзына Шурдым Гъэзалий Къэсбот и къуэр. Ар псэужамэ, и ныбжьыр мы гъэм илъэс 85-рэ ирикъунут. Гъэзалий и цIэр зэи хэмыгъуэщэжыну къыхэнащ Къэбэрдей-Балъкъэр къэрал университетым и гъащIэм. Абы зэфIэкIыу иIам, и IэдакъэщIэкIхэм пщIэ хуу­мыщIын плъэкIынукъым».
Шурдымым и лэжьыгъэфIым, и Iэдакъэ къыщIэкIахэм, дунейм къытрина и IэужьыфIым пшыхьым щытеп­сэ­лъы­хьащ Шэрджэс Заур.
Гъэзалий лъэпкъ щIэныгъэм и зыу­жьыныгъэм хэлъхьэныгъэшхуэ хуэ­зыщIа еджагъэшхуэт. Адыгэхэм ящыщу физическэ химие унэтIыныгъэмкIэ япэу щIэныгъэхэм я доктор цIэр зы­фIащауэ щытар арат. КъБКъУ-р къы­щызэрагъэпэща илъэ­сым къыщы­щIэдзауэ дунейм ехы­жыху Гъэзалий щылэжьащ а еджапIэ нэхъыщхьэм. Арат университетым ­фи­зическэ хи-мие унэтIыныгъэмкIэ ­кафедрэ къы­щызэзыгъэпэщари. Химие щIэныгъэм и лъабжьэр ди республикэм щигъэбыдэри, иужькIэ, аспирантури диссертацэ совети къыщы­зэIуихауэ щытащ. ЩIэныгъэ­лIым и нэIэм щIэту ­химие щIэныгъэхэмкIэ я кандидат, доктор лэжьыгъэхэр цIыху пщIы бжыгъэхэм пхагъэкIащ. Ар щIэх-щIэхыурэ ирагъэблагъэрт къэралым, апхуэдэу дуней псом щекIуэкI зэ­хы­хьэхэм, конференцхэм.
Шурдымым иригъэкIуэ­кIырт щIэныгъэ-къэхутэныгъэ лэжьыгъэхэри. Дунейм къытехьащ абы и монографиеу 4-рэ студентхэр зэре­джэну тхылъу 5-рэ. И Iэдакъэ къы­щIэкIахэр псори зэхэту щIэныгъэ лэ­жьыгъэ 500-м щIегъу.
Емызэшыжу иригъэкIуэкI лэжьыгъэм папщIэ илъэс блэкIам Естес­твознаниемкIэ Урысейпсо Акаде­- мием и Президиумым и унафэкIэ ­Шурдым Гъэзалий «ЩIэныгъэ школым и къы­зэгъэпэщакIуэ» цIэ лъапIэр къыфIа­щауэ щытащ. Апхуэдэуи ­РАЕН-р къы­зэрыунэхурэ илъэс 20 ­щри­къум ирихьэлIэу «PRIMUS INTER PARES» (зэ­хуэдэхэм я нэхъыфI) орденыр къратащ.
Махуэ къэскIэ зыхуэзэу щыта и лэжьэгъухэм апхуэдэу ягу къагъэ­кIыжащ Гъэзалий и гушыIэ дахэхэр, хэлъа хабзэр, студентхэм зэра­дэлажьэу щы­та щIыкIэхэр. Апхуэдэу къызэхуэсахэр ирагъэплъащ Шурдымым и сурэт гъэ­лъэгъуэныгъэу пшы­хьым ирихьэлIэу ягъэхьэзырам.
ЗэIущIэм и кIэухыу Шурдым лъэп­къым къыбгъэдэкIыу къэпсэлъа Юрэ фIы­щIэ яхуищIащ пшыхьыр къызэ­зыгъэпэщахэми, Гъэзалий гуапэу зигу илъу абы къекIуэлIахэми.