Хар къалайда да - жарыкълыкъ, шуёхлукъ, огъурлулукъ.

Халкъланы бирлигини кюню бизни республикада «Россей - биригипди!» деген чакъырыу бла белгиленнгенди. Шахарлада, районлада, элледе да тюрлю-тюрлю къууанчла, ол санда сурат кёрмючле, спорт эришиуле, концертле да бардырылгъандыла. Бек уллу байрам а, хар замандача, Нальчикде Къырал концерт залны къатында ётгенди. Аны аллында майдан РФ-ни эм КъМР-ни къырал байракъларын суратлагъан тюрсюнлю шарла бла жасалып эди. Малкъар,орус, къабарты тилледе жырла,тепсеу тартыула уа узакъдан окъуна эшитилгендиле.
Сагъат онеки бола алайгъа КъМР-ни Парламентини, Правительствосуну, Жамауат палатасыны къуллукъчулары, профсоюзланы, тюрлю-тюрлю министерстволаны бла ведомстволаны, партияланы,бийик эмда энчи окъуу юйлени,жамауат организацияланы да келечилери кёп санда жыйылгъандыла. Саулай юйюрлери бла окъуна келгенле кёп эдиле.
Баш кюн сууугъуракъ болгъаны себепли байрамны къурагъанла, митинг этмей, саулай да концерт программаны кёргюзтгендиле. Аны  Фатимат Чехмахова бла Атталаны Азнор бардыргъандыла.
Къонакъланы уа Азамат Цавкилов, Текуланы Амур, Гергъокъаланы Халимат, Жаболаны Замира, Азамат Беков, Залим Катанчиев, Жаникаланы Эльдар, Артур Губжоков, Оксана Хакулова, Артур Дышеков, «Терк къазакъла», «Таулула», «Бзерабзе», «Арабеск», «Нальцук», «Насып», «Шагди» ансамбльле, Руслан Безроков, Амирхан Амшоков, Мокъаланы Феруза, Астемир Ервасов, башха артистле да жарыкъ жырлары эмда терк тепсеулери бла къууандыргъандыла.
Балкизовланы жаш юйюрюню - Искусстволаны Шимал-Кавказ къырал институтунда окъугъан Гульшахха бла Ростовда Рахманинов атлы къырал консерваторияны студенти Тимургъа - жыйылгъанла бютюн сюйюп тынгылагъанларын толкъун къарсла бла кёргюзтгендиле. «Dans masters» ансамбль а майдандагъыланы да тепсетип жылындыргъанды.
Ызы бла волонтёрла Россейни юч тюрсюнлю уллу байрагъын ортагъа чыгъаргъандыла. Олсагъат майданда РФ-ни Гимни эшитилгенди. Аны КъМР-ни культурасыны сыйлы къуллукъчусу Людмила Ашхотованы башчылыгъында КъМКъУ-ну студентлерини хору жырлагъанды.
Концертден сора ГКЗ-да «Минин и Пожарский» эмда «1812» деген суратлау фильмле кёргюзтюлгендиле.
Майданда сабий художестволу школгъа эмда сабий эмда жаш тёлю чыгъармачылыкъны арасына жюрюгенле ишлеген затланы кёрмючю да къуралгъанды.

ХОЛАЛАНЫ Марзият.
Поделиться: