|
Мусуков Алий Правительствэм и УнафэщI къулыкъур зэдэарэзыуэ иратыж.
17 октября, 2019 - 06:58
КъБР-м и Парламентым жэпуэгъуэм и 15-м щекIуэкIа зэIущIэм депутатхэм Iэ щаIэтащ КъБР-м и Правительствэм и УнафэщI къулыкъум ягъэувыну Мусуков Алий къызэрагъэлъэгъуам теухуауэ.
КъБР-м и Iэтащхьэм и Администрацэм и УнафэщI Къуэдзокъуэ Мухьэмэд жиIащ Мусуков Алий и Iуэху бгъэдыхьэкIэм псори зэрыщыгъуазэр икIи и зэфIэкIыр дяпэкIи республикэм и зыужьыныгъэм хуигъэщхьэпэну абы зэрыщыгугъыр. «Къэбэрдей-Балъкъэрым и Iэтащхьэ КIуэкIуэ Казбек Правительствэм и УнафэщI къулыкъур хуигъэфащэу къигъэлъэгъуащ Мусуков Алий. Ар зымыцIыху къытхэткъым, нэхъ ипэкIэ зыпэрыта къэрал IэнатIэхэм жэуаплыныгъэ хэлъу, абы щыгъуэми ткIийуэ лэжьыгъэр иубзыхуфу зыкъигъэлъэгъуащ. ДызэреплъымкIэ, абы и зэфIэкIыр хуиунэтIыфынущ республикэм и зыужьыныгъэм. Абы къыхэкIыу тфIэкъабылт депутатхэм мы Iуэхур дэфIыгъыну», - жиIащ Къуэдзокъуэм.
Мусуков Алий псалъэ щратым, депутатхэм ехъуэхъуащ КъБР-м и Парламентым и еханэ хэхыгъуэм и лэжьыгъэм зэрыщIидзамкIэ, апхуэдэуи КъБР-м и Iэтащхьэм и дзыхь къригъэзу а IэнатIэр къызэрыхуигъэлъэгъуам папщIэ фIыщIэ зэрыхуищIыр къыхигъэща
- Пэжыр жыпIэмэ, фIыуэ зыхызощIэ ар жэуаплыныгъэ зыпылъ къулыкъуу зэрыщытыр икIи фыкъызогъэгугъэ ди мурадхэр къыдэхъулIэн щхьэкIэ си къарум семыблэжыну, - жиIащ Мусуковым. - Иджыблагъэ КъБР-м и Iэтащхьэ КIуэкIуэ Казбек къэкIуэну илъэситхум ди щIыналъэм зэрызиужьыну программэр утыку кърихьащ. Абы, зэрыфщIэщи, лъэныкъуэ куэд къызэщIеубыдэ икIи республикэм и Правительствэм и УнафэщIым и къалэн нэхъыщхьэ хъун хуейщ цIыхухэм я псэукIэр егъэфIэкIуэныр, республикэм и хэхъуэр нэхъыбэ щIыныр, шынагъуэншагъэмрэ хабзэмрэ къызэгъэпэщыныр, нэгъуэщIхэри.
Мусуковым жиIащ УФ-м и Президентым иубзыхуа лъэпкъ проектхэр гъэзэщIэным гулъытэ хэха зэрыхуащIынур. ЩIыналъэм и экономикэм зегъэужьыным ехьэлIа Iуэхухэм нэмыщI, абы къыхигъэщащ цIыхухэм къэралыр зэрадэIэпыкъуми я нэIэ трагъэтын зэрыхуейр. «КъБР-м и Iэтащхьэм къызэрыхигъэщащи, мы зэманым Къэбэрдей-Балъкъэрыр унэтIыныгъэ зэхуэмыдэхэмкIэ иужь итщ, къэралым адрей и щIыналъэхэм елъытауэ. Абы щыгъуэми и промышленностымкIэ, мэкъумэш IэнатIэмкIэ, туризмэмкIэ ехъулIэныгъэфIхэр къигъэлъэгъуэфыну Iэмал иIэщ, - жиIащ Мусуковым. - Абы къыхэкIыу республикэм и Правительствэр хэплъэжын хуей хъуащ социально-экономикэ зыужьыныгъэр къэзыгъэлъагъуэ программэм. Псом хуэмыдэу щIыналъэм къыщIигъэкIыр нэхъыбэ зэрищIынур абы къыщылъытащ. Къэбгъэлъагъуэмэ, щIыналъэм и IэнатIэ псори къызэщIиубыдэу программэ 25-м долэжь. Ди гугъэщ КъБР-м и Парламентымрэ Правительствэмрэ а къалэн мытыншхэм зэгъусэу пэлъэщыну».
Депутатхэм упщIэ зыбжанэкIэ зыхуагъэзащ къэпсэлъам. Депутат Пономаренкэ Роман щIэупщIащ зи гугъу ящI пIалъэм къриубыдэу республикэм и хэхъуэр зэрырагъэфIэкIуэну Iэмалхэр зыхуэдэм, лэжьыгъэ IэнатIэ мин 12-м нэблагъэ къызэрагъэпэщыну зэрытраухуэм.
- КъБР-м и Iэтащхьэм иубзыхуа лэжьыгъэр зэдгъэхъулIэныр - ар псом хуэмыдэу 2025 гъэм ирихьэлIэу щIыналъэм къыщIигъэкIым хуэдитIкIэ хэгъэхъуэнымрэ лэжьыгъэ IэнатIэщIэхэр къызэIухынымрэ епхащи - тыншу уи нэгу къыпхущIэмыгъэхьэми, тхузэфIэмыкIын хэлъу къыщIэкIынкъым, - къыхигъэщащ Мусуков Алий. - Абы щхьэкIэ, псалъэм папщIэ, 2022 гъэм ирихьэлIэу республикэм къыщалэжь псоми проценти 10-кIэ хэдгъэхъуэн хуейщ. Мыбдеж куэдкIэ ущыгугъ хъунущ республикэм и промышленностым. Ар проценти 2,3-кIэ хэдгъэхъуэну тхузэфIэкIмэ, 2025 гъэм ирихьэлIэу а IэнатIэм къыщIигъэкIыр сом меларди 150-м нэдгъэсыфынущ. Апхуэдэуи мыхьэнэшхуэ иIэщ электроэнергетикэм зэрызедгъэужьым, абы бюджетым къыхуихь налогым. Мэкъумэш IэнатIэм и гугъу пщIымэ, сэ сызэреплъымкIэ, иджыпсту дызэрыхуейм хуэдэ дыдэу абы зиужьыркъым. Аращи, 2025 гъэм ирихьэлIэу хуэди 2,5-кIэ хэдгъэхъуэн хуейщ абы къыщIигъэкIым. Апхуэдэуи экономикэм и хэхъуэр зыIэтыфыну Iэмалхэм ящыщщ туризмэр. Абы и лъэныкъуэкIэ тщIапхъэр зэфIэдгъэкIмэ, республикэм зыгъэпсэхуакIуэ къакIуэхэм я бжыгъэр 2025 гъэм ирихьэлIэу цIыху мелуанрэ ныкъуэм илъэсым тхунэгъэсынущ. Дауи, апхуэдэ мурадхэр къыдэхъулIэныр епхауэ щытынущ инвестицэ Iуэхухэми. Шэч хэмылъу, а Iэмалхэр псори сэбэп хуэхъунущ IэнатIэщIэхэр къызэIуха хъунми.
КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым и унафэщI Емуз Нинэ лъэпкъ щэнхабзэхэмрэ анэдэлъхубзэхэмрэ хъума зэрыхъунум къыщытеувыIэм, къыхигъэщащ мы зэманым школакIуэ псоми пщIэншэу зэрырамытыр зэреджэну тхылъхэр икIи щIэупщIащ абы хэкIыпIэу къыхуагъуэтыфынум. Мусуковым жиIащ илъэс куэд хъуауэ ныбжьыщIэхэр пщIэншэу учебникхэмкIэ къызэрагъэпэщыныр проценти 100-м зэрахунэмыгъэсыр, ауэ нэгъабэ ар процент 91-кIэ зэрагъэзэщIар. АрщхьэкIэ 2019 гъэм зэреджэну тхылъхэм я бжыгъэм къызэрыхэхъуам гугъуехьхэр къишэжащ икIи процент 50-м щIигъукIэ къызэрагъэпэщыфауэ аращ.
- КъБР-м и Iэтащхьэм и унафэкIэ мы гъэм сом мелуани 180-рэ хухэтхащ тхылъхэр къэщэхуным. АхъшэмкIэ тхылъыщIэ мин 430-рэ зэрагъэпэщащ, анэдэлъхубзэхэмкIэ учебникхэри хэту (мин 47-рэ). Ауэ, зэрыжыфIауэ, диIэщ иджыри гугъуехьхэр, абыхэм делэжьын хуейщ, - къыхигъэщащ Мусуковым.
Депутатхэм я упщIэхэр теухуауэ щытащ узыншагъэр хъумэнымкIэ IэнатIэм, туризмэм, щIыналъэ телевиденэр спутник Iэма-лым зэрыхагъэхьэным, нэгъуэщIхэми. Дэтхэнэми и упщIэм Мусуков Алий жэуап иритащ. КъыкIэлъыкIуэу депутатхэм зэIухауэ Iэ яIэтащ икIи псори зэдэарэзыуэ абы хуагъэфэщащ КъБР-м и Правительствэм и УнафэщI къулыкъур.
КъБР-м и Парламентым и УнафэщI Егоровэ Татьянэ Мусуковым ехъуэхъуащ ехъулIэныгъэ иIэу лэжьэну.
Мусуков Алий депутатхэм фIыщIэ яхуищIащ, пщIэ зыпылъ IэнатIэ дзыхь къызэрыхуащIым папщIэ.
ЗэIущIэм и етIуанэ Iыхьэм депутатхэм Iэ яIэтащ Шэджэм районым и суд IуэхущIапIэ №3-м и зэзыгъэкIуж хеящIэу КIагуэ Джульеттэ, Аруан суд IуэхущIапIэ №3-м - Лъэпщокъуэ Хъусен ягъэкIуэным теухуауэ. Апхуэдэуи и депутат къалэнхэр щхьэщахащ Къанокъуэ Арсен, Урысей Федерацэм и Федеральнэ Зэхуэсым ФедерацэмкIэ и Советым республикэм къыбгъэдэкIыу зэрыхагъэхьам къыхэкIыу.
КъБР-м и Парламентым Къэпщытэныгъэмрэ регламентымкIэ и комитетым хагъэхьащ Ксанаевэ Еленэ (ар иужькIэ абы и унафэщIу ягъэуващ), УхуэныгъэмкIэ, псэупIэ-коммунальнэ IэнатIэмрэ гъэсыныпхъэ-энергетикэ IуэхущIапIэхэмкIэ комитетым - Кебеков Владимир, Къэпщытэныгъэмрэ регламентымкIэ, Экономикэ политикэмкIэ, зыужьыныгъэмрэ хьэрычэт IуэхумкIэ комитетхэм - Парафилов Дмитрий.
Депутатхэр япэ еджэгъуэу хэплъащ «Къэбэрдей-Балъкъэр Республикэм лэжьыгъэ IэнатIэм щыIэ и щхьэхуэныгъэхэр къэзыгъэлъагъуэ коэффициентыр гъэбелджылыным теухуауэ» КъБР-м и Законым и проектым.
КъБР-м финансхэмкIэ и министрым и къалэнхэр зыгъэзащIэ Лисун Еленэ тепсэлъыхьащ щIыналъэ бюджетыр 2019 гъэм и япэ илъэс ныкъуэм зэрагъэзэщIам.
Къэпсэлъам къызэрыхигъэщамкIэ, зи гугъу ящI пIалъэм республикэм и хэхъуэр сом мелард 15,6-рэ хъуащ, къигъэсэбэпар - сом мелард 14,6-рэ. Профицитыр сом мелуан 970,5-рэ хъурти, ар къэрал щIыхуэр гъэмэщIэным хуаутIыпщащ (2019 гъэм бадзэуэгъуэм и 1-м ирихьэлIэу сом меларди 8,6-рэ мэхъу). Налогымрэ нэгъуэщI хэхъуэхэмрэ процент 49-кIэ ягъэзэщIащ (сом меларди 5,7-рэ).
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|
27.03.2024 - 13:58 Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I |
|
27.03.2024 - 12:25 Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх |
|
27.03.2024 - 09:03 (ГъащIэ теплъэгъуэ) |
|