Бу кюнледе Къабарты-Малкъарда право низамны сакълаучу органлада къуллукъ борчларын толтура ёлгенлени эсгериу жумушла барадыла. КъМР-ни Башчысы Казбек Коков аны бла байламлы Обращение этгенди.
«Биз республиканы мамырлыгъын бла ырахатлыгъын къоруулар ючюн жанларын аямагъанланы алларында баш урабыз. Аланы атлары ёмюрде да унутуллукъ тюйюлдю. Ол бушуулу кюнлени эсгере, биз бир ниетли болургъа, терроризмге къажау бирден сюелирге, огъурсуз радикализмни бла экстремизмни жолларын кесерге керекбиз. Жаланда бирге болуп, къырал власть органланы, право низамны сакълаучуланы, жамауатны эмда халкъыбызны келир заманына къайгъыргъанланы барысыны да кючлерин бирикдирип хорлаяллыкъбыз шёндюгю заманны бек уллу къоркъууларындан бирин, жаланда алай бла жалчыталлыкъбыз Къабарты-Малкъарда мамыр, ырахат жашауну»,-дегенди республиканы оноучусу.
Ыйых кюн а Нальчикде Милициячыланы скверинде бушуулу митинг болгъанды. Быллай жыйылыула Ишчи борчларын толтургъан кезиуде аманлыкъчыланы къолларындан жоюлгъан право низамны сакълаучу органланы келечилерини кюнюне аталып, хар жылдан да бардырыладыла.
Анга аманлыкъчыла ёлтюрген полициячыланы жууукълары бла бирге КъМР-ни Башчысы Казбек Коков, Парламентни спикери Татьяна Егорова, премьер-министрни къуллугъун толтургъан Мусукланы Алий, власть органланы, жамауат эм дин организацияланы келечилери, право низамны сакълаучула, ведомствону ветеранлары да къатышхандыла.
Аны ача, ич ишле министрни къуллугъун толтургъан полицияны полковниги Назир Мамхегов 2005 жылда октябрьде бандитле Нальчикге чабыууллукъ этгенлерин, республикада мамырлыкъны сакълай, право низамны сакълаучу органланы келечилери жашауларын аямагъанларын айтханды. «14 жыл мындан алгъа болгъан бушуулу ишле республиканы тарыхына жазылгъандыла. Бандитле шахарда кюч структураланы объектлерине чабыууллукъ этип, аны къолгъа этерге кюрешгендиле. Алай право низамны сакълаучула жанларын аямай, алагъа къажау тургъандыла, аланы батырлыкъларыны хайырындан аманлыкъчыла кир муратларына жеталмагъандыла»,- деп чертгенди ол.
Назир Мсостович ол бушуулу кюнледе 15 мамыр адам жоюлгъанларын, тынчлыкъ ючюн право низамны сакълаучу органланы 37 келечиси жанларын бергенлерин, кёпле жаралы болгъанларын айтханды. «2005 жылдан сора да терроризмге, экстремизмге къажау ишде коллегаларыбызны тас этгенбиз. Алай аланы хар бирини да аты бизни эсибиздеди.
Жигитлерибиз кеслерини, жууукъларыны юслеринден сагъыш этмегендиле, антларына жашауларыны ахырына дери кертичи болгъандыла»,- дегенди ол эмда жыйылгъанланы ишчи борчларын толтургъан кезиуде ёлтюрюлген полициячыланы бир минут шумсуз туруп эсгерирге чакъыргъанды.
Ведомствону оноучусу аманлыкъчыланы къолларындан жоюлгъан полициячыланы юйюрлерине болушлукъ дайым да этилгенин, ала унутулмагъанларын да айтханды.
Экстремизмге къажау министрни къуллугъун толтургъан Залим Кашироков а битеу республикада да бу кюнледе бушуулу, эсгериу жумушла бардырылгъанларын, мамыр жашау ючюн жанларын бергенле эсгерилгенлерин чертгенди. «Ала Къабарты-Малкъарны къан тёгюлюуден сакълагъандыла. Бу кюн биз алагъа баш урабыз, аланы аллында борчубуз уллуду»,-дегенди ол.
Докладчы 2005 жылдан сора да терактла тохтамагъанларына, аманлыкъчыланы къолларындан право низамны сакълаучула, власть органланы келечилери, дин къуллукъчула, мамыр адамла ачыгъанларына жарсыгъанды. «Халкъны къоркъутуп, ала кеслерини ниетлерин, оюмларын жаяргъа умут этгендиле. Алай ахыр жыллада право низамны сакълаучу органланы келечилерини батырлыкъларыны, борчларына кертичиликлерини хайырындан биз къоркъмай, мамыр республикада жашайбыз»,-дегенди ол эмда чабыууллукъгъа къатышханла жууапха тартылгъанларын чертгенди.
КъМР-ни Жамауат палатасыны башчысыны орунбасары – «Заман» газетни баш редактору Атталаны Жамал а Нальчикни орамларында сюйюп жаяу айланнганын, шахарны айбатлыгъы, тамашалыгъы ючюн жюреги къууаннганын айтханды. «Парклада, скверледе, орамлада адамла солуйдула, ушакъла бардырадыла, ариулукъгъа къууанадыла. Тёгерек тынчлыкъдан, келир заманнга ышаныулукъдан толуду. Алай хар заманда да былай болмагъанды, юйден чыгъаргъа окъуна къоркъгъан кезиуле эсибиздедиле. Тынчлыкъ, ырахматлыкъ, ышаныулукъ, мамырлыкъ тохташыуларында право низамны сакълаучу органланы келечилерини къыйынларын барыбыз да иги ангылайбыз»,-дегенди ол.
Митингде сёлешгенле жаш адамланы аманлыкъчы къауумлагъа тартыргъа кюрешгенле бюгюн да болгъанларыны, аны ючюн сакълыкъны тас этмезге, аланы сёзлерине ийнанмазгъа чакъыргъандыла.
Ёлтюрюлген полициячыланы хурметине дин адетле да бардырылгъандыла. КъМР-ни Муслийманларыны дин управлениясыны башчысы Хазратали Дзасежев, аны орунбасары Алим Сижажев бла болушлукъчусу Аслан Гедгафов дууа тутдуруп, Аллахдан мындан ары бир жерде да быллай къыйынлыкъ болмазын тилегендиле. Республиканы килисаларыны благочинныйи Валентин Бобылев да христиан тёреле бардыргъанды.
Ахырында жыйылгъанла эсгертмеге гюлле салгъандыла.
