Тюнене Москвада Россейни Президентинде Стратегия айныу эмда миллет проектле жаны бла советни президиумуну жыйылыуу болгъанды. Аны РФ-ни Правительствосуну Председатели Дмитрий Медведев бардыргъанды. Анга видеоконференция халда КъМР-ни Башчысы Казбек Коков да къатышханды.
Кенгешде «Саулукъ сакълау» бла «Демография» миллет проектле регионлада къалай толтурулгъанларына къаралгъанды. «Ала адамлагъа бек керекли проектледиле. Хар регионну да энчилиги барды. Сабий садланы саны, тынгылы медицина болушлукъ алыу онгла жаны бла да. Бизни борчубуз – 2024 жылгъа инфарктладан бла инсультладан, къан тамырла бла байламлы башха аурууладан да ёлгенлени санын тёрт кереге азайтыргъады»,-деп айырып айтханды Дмитрий Медведев, жыйылыуну башлай.
Битеу ол ишлеге федерал бюджетден 11 миллиард сомдан артыкъ бёлюнюрге белгиленеди. Дагъыда 4 миллиард сомгъа уа, дегенди россейли правительствону башчысы, 509 мобиль медицина комплексле алыргъа мурат этиледи. «Регионланы оноучулары ол комплексле не къадар терк алынып, ишлеп башларча этер ючюн терк къармашыргъа керекдиле. Бу жумуш заманында толтурулуруна къаты контроль этерге керек боллукъду»,-деп эсгертгенди Дмитрий Медведев.
Жыйылыуда РФ-ни урунуу эмда социал къоруулау министри Максим Топилин, Россейни саулукъ сакълау министрини орунбасары Наталья Хорова, къыралны субъектлерини башчылары да докладла этгендиле.
Къабарты-Малкъарда бюгюнлюкде «Демография» эмда «Саулукъ сакълау» миллет проектлеге кёре онбир регион программа жашауда бардырылады. Ала юч жыл толмагъан сабийлени яслиле бла жалчытыугъа, тамата тёлюню жашауун игилендириуге, спортну айнытыугъа, биринчи медицина-санитар болушлукъну игилендириуге, жюрек эмда къан тамырла бла байламлы эмда онкология ауруулагъа къажау кюрешни къыйматлы бардырыугъа бурулупдула.
Салыннган борчланы толтурур муратда республиканы районларында жангы фельдшер-акушер пунктла, сабий садла, ясли блокла ишлене турадыла. Гитчелеге 2021 жыл башланыргъа школгъа дери жюрюрча къошакъ халда 3000 чакълы жер къураллыкъды. Биринчи медицина-санитар болушлукъ бериуню регион арасы ачылгъанды. Нальчикде онкодиспансерде, Республикалы сабий клиника больницаны сабий поликлиникасында, Къан тамырла бла байламлы аурууладан багъыуну арасында оборудование алышындырыла турады, онкология саусузлагъа амбулатор амал бла болушлукъ берген арала ачылгъандыла.
Халкъны социал жумушла бла жалчытыучу комплекс арала да элледе уллайгъанланы саулукъларын тинтир ючюн керек болгъан энчи транспорт бла жалчытылыныпдыла. Залукокоажеде физкультура-саулукъландырыу комплексни къурулушу бошала турады, Къашхатауда аллай объектни ишлерге хазырланадыла. Быйыл республиканы районларында кёп профильли 9 спорт майданны, Атажукинода бла Аушигерде футбол майданланы хайырланыргъа берирге белгиленеди. Къабарты-Малкъарны 42 спорт организациясына жангы тийишли оборудование алыннганды.
Советни жыйылыууну эсеплерине кёре, республиканы бир-бир министерстволарыны бла ведомстволарыны оноучуларына миллет проектлеге деп бёлюннген ахча не къадар толу эмда керекли жумушлагъа къоратылырына сакъ болургъа, социал объектле тохташдырылгъан заманнга ишленип бошалырларын жалчытыргъа буюрулгъанды.
